ATTAT pillugu Tommy Marø naalakkersuisunut saqqummiussissaaq

Atuarfiit ilinniagaqarfiillu qarasaasiakkut attaveqaataata ATTAT-ip ingerlaannarnissaa anguniarlugu suliniutit Kultureqarnermut Ilinniartitaanermullu naalakkersuisup Tommy Marøp naalakkersuisunut aqagu saqqummiutissavaa.
Allattoq Jaaku Lyberth
novembarip 13-at 2008 16:43

Ilinniartoqarfinni internet-imik qanoq atuitigineq apeqqutaatinnagu akimik aalajangersimasumik akiillisalernissaq anguniarlugu Kultureqarnermut Ilinniartitaanermullu naalakkersuisoqarfimmi misissuisoqarpoq.

Tamanna naalakkersuinikkut iliuuseqarnikkut aatsaat anguneqarsinnaammat, Kultureqarnermut Ilinniartitaanermut Ilisimatusarnermullu Naalakkersuisoqarfik tusagassiuutinut nalunaaruteqarluni taamatut allappoq.

Qarasaasiakkut attaveqaat-ip ATTAT-ip ingerlanneqarnera siorna 2007-imi 8 millioner koruunit missaannik aningaasartuutaavoq ukiormannalu 10 millioner koruunit aningaasartuutaanissaat naatsorsuutigineqarluni.

ATTAT Ilisimatusarfiup ataani inissisimavoq, Ilisimatusarfiullu aningaasatigut ingerlatsineranut ATTAT ajornartorsiortitsilluni.

Ilisimatusarfiup siulersuisuisa pilersaarutigigaluarpaat qarasaasiakkut attaveqaatip ATTAT-ip ukiup tulliata aallartinnerani matussasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq