Attat malinnaasinnaajunnaarpoq

Atuarfeqarfinni qarasaasianik ingerlatsivik Attat, atuarfeqarfinnit, inuutissarsiutitigut ilinniarfeqarfinnit kiisalu ilinniarnertuunngorniarfinnit atorneqartartoq, pisariaqartitanut malinnaasinnaajunnaarpoq. Qarasaasiamik atuinermik periarfissarpassuit matuneqarsimapput, taamaakkaluartorli ukioq mannamut aningaasaliissutigineqartut 4 miliuunit koruuninik sipporneqartussanngorput.

- Qarasaasiakkut allannermi sukkassuseq ajornartorsiutigaarput. Taamatuttaaq Inerisaavimmi nalilersuisarnermut immikkoortortaqarfimmi 3.klassimi 7. klassimilu atuartut pisinnaasaannik misiliinerit, atuarfinni ataasiakkaani naammassineqaraangata, inerneri toqqaannartumik qarasaasiaq atorlugu Inerisaavimmut ingerlatinneqartaraluarput. Tamannali qarasaasiap arriippallaarnera pissutigalugu taamaatiinnartariaqarsimavarput, Ole Frederiksen Inerisaaviup qaraasaasialeriffiani aqutsisoq oqarpoq. Attammut ukioq manna 6 miliuunit koruunit aningaasaliissutigineqarput, amigartoorutaasussallu 4 mio. koruuniusut Inerisaaviup aningaasaqarniarnerata iluani nassaarineqartariaqalissapput. Aningaasassaaleqineq Attammut qanoq kinguneqarpa?

- Nipitigut, isiginnaagassiatigut, messengerimut, skypemut, Artomullu attaviit akissaqannginneq pissutigalugu matuneqartariaqarsimapput, Ole Frederiksen oqarpoq.

Taamatuttaaq atoqatigiinnermut tunngaasuteqartunik pornonik, inatsisinillu unioqqutitsilluni aningaasanoorfinnut aallersinnaaneq matuniarneqarsimavoq. Atuarfeqarfinnittaaq qallunaatut tuluttullu atuartitsinermi atortussat, atuartuni angajullerni atorneqarsinnaasut, Danmarkimiit aaneqarsinaasut aaneqarsinnaajunnaassapput, pineqartuni taakkunani nipit, isiginnaagassallu internetimut inissiinermi atorneqakkajuttarmata.

Ilisimatusarfiup siulersuisuisa Attat sapaatip akunnerata tulliani oqaluuserissagaat Inerisaaviup pisortaata Jens Jakobsenip oqaatigaa.