Attat: Arriippallaarnera atuartunut akornusiivoq
Massakkut sipaarniartoqarnera pissutigalugu qarasaasiakkut nipitalinnik filmitalinnillu pissarsisoqarsinnaanngitsoq, Qaqortumi Ilinniarnertuunngorniarfiup pisortaa Gregers Aagaard oqarpoq.
- Atuartut paasissutissanik ujaasiniartillugit interneti ima arriittartigaaq, IT-mik atuartitsiniarneq iluamik ingerlanneqarsinnaajunnaartarluni, Gregers Aagaard oqarpoq. Qaqortumi Attat 512 kilobytiuvoq tamannalu annikippallaarujussuaqaaq, Gregers Aagaard oqarpoq.
- Taanna atuartut tamarmik ataatsikkoorlutik aqqutiginiartussaavaat. Taanna bilit aqqutaatut amitsunnguatut ippoq, amippallaarmallu siuleriaattoqalersarluni, nassuiaavoq.
Taassuma ilinniarnertuunngorniat atuartinneqarnerminnut atatillugu paasissutissanik ujaasisinnaanissaat ujartorpaa.
- Ilinniagaqarlutik ingerlaqqinnissaannut tamanna pingaaruteqaqaaq, ingerlaqqikkunimmi ujaasisinnaanissaat naatsorsuutigineqareertarmat.
Taamatuttaaq internetimi ullumikkut saqqummiunneqartartunik atuartitsinermi atortussarsiorsinnaanissaq taassuma ujartorpaa.
- Ullormiit ullormut atuartitsinermi atortussanik ullutsinnut naleqquttunik pissarsisoqarsinnaavoq. Ullumikkulli taamatut periarfissaqanngilagut, taamaammallu Danmarkimiit kinguarsimanerujussuarmik inissisimalluta, oqarpoq.
Gregers Aagaardip neriuutigaa siunissami atuineq apeqqutaatinnagu aalajangersimasumik akeqartitsisoqarsinnaalissasoq.
Mannali tikillugu Tele taamatut pilersaarusiorsimanngilaq.
- Namminersornerullutik Oqartussat ilinniartitaaneq eqqarsaatigalugu Telemik isumaqatigiissuteqarsinnaanissaa neriuutigaara, Gregers Aagaard naggasiivoq.
Nittartakkamut Attammut akisussaasup, Inerisaaviup naatsorsuutigaa, ukiormanna aningaasartuutissat 4 miliuunit koruuninik sipporneqassasut, tamatumunnga atuarfiit atuinerulersimanerat pissutaatinneqarluni. Atuinerujussuarlu qarasaasiap sukkassusaanut sunniuteqartarpoq.