Attartukkamik ineqartut kateriffeqaqqilissapput

- Inissianut akiliutit qaffaneqartarneri unitsinniarlugit illersorfissaqartariaqarpugut, IPK´mik aallartitseqqiiniartut ilaat, Buster Betrthelsen oqarpoq.

- Ukiuni kingullerni tusartarpagut ineqarnitsinnut akiliutinik qaffaanerit sukujuillu tamakkua pisartut. Unitsinneqarnissaat anguniarlutigit illersorfissaqarniarlutalu kattuffik aallartinniarsarivarput. Isumaqaratta taamaattumik ineqartut tamattaalluta katuffeqarnissarput massakkut pisariaqarluinnalersimasoq, Buster Berethelsen oqarpoq.

Allaffimmillu pilersitsinermi siunertaavoq, inatsisilerituumik allaffimmiumillu, nunatsinni tamaniit saaffiginnissutinik isumaginnittussamik,  atorfinitsitsisoqassasoq.

- Taassuma innuttaasunik ulluinnani sullissineq suliarisussaassavaa. Taavalu soorlu arlaannik saqqummertoqarpat, soorlu ineqarnermut akiliutinik qaffaasoqalerpat, Naalakkersuisut inatsisit malillugit iliuuseqarnersut inatsisilerituup misissortassavaa, Buster Berthelsen oqarpoq.

Pisortat inissiaataanni ineqartut kattuffiannut ilaasortaajumanersut qaammatip matuma naanerani aperineqassapput. Ineqarnermut Naalakkersuisoqarfik suleqatigalugu innaallagissamullu akiliutissap nassiussuunneqarneranut atatillugu tamanna pissalluni.

Ilaasortaanermut qaammammut 25 koruuniussasoq kattufiup ilimasaarutigaa, maajillu aallartilaarnerani ataatsimeersuartoqassasoq ilimagineqarpoq.