Attartortuunerminni atugassarititaasunik ilisimasaqanngingajattut

Assersuutigalugu apersuinermi peqataasut 162-iusut

affangajaat isumaqarput inissianik piginnittut tassaasut INI, tassa Namminersornerullutik Oqartussat kommunillu piginnittuunngitsut.

Apeqqutigineqartoq alla tassaavoq, kikkut akiliissappat, eqqaamiorisaq inigisaminut akiliinngippat? Apeqqummut tassunga arlallit akipput, INI imaluunniit kommune akiliissasoq, kisianni akissut eqqortoq tassaavoq attartortut allat akiliisussaammata, tamannalu inigisanut akiliutit qaffakkaluttuinnarnerannut pissutaaqataammat. Siorna inigisaminnut akiliisimanngitsut peqqutigalugit 3 miliuuni koruunit pallillugit annaasaqaatinut matussutigineqarput.

Aamma akissutit affaasa missaasa inigisamut pisinnaatitaaffinnut tunngasut kukkusumik akisimavaat aamma arlallit ileqqaarutit sumut atorneqartarnersut nalornivaat.

Taamaattorli apersuinermi peqataasut arfineq marluk apeqqutinit 15-iusunit 14-it eqqortumik akisimavaat. Taakkununnga ilaalluni Bettina A. Hansen, taassumalu makitsinikkut akissarsiassaq anneq pissarsiaraa, tassaasoq qaammammi ataatsimi inigisamut akiliut. Attartortunut atugassarititaasut paaserusukkukkit INIp nittartagaa iserfigiinnassavat tassaasoq: www.ini.gl