Attartortuujunnaarlutit suli piginnittunngorsinnaavutit
2007-imi annikitsumik allanngortinneqarpoq taannalu malillugu nalinginnaasumik nalilersuinermi akigitinneqartoq akigitinneqassaaq aaqqissuussinerup aallartinnerani teknikkikkut akigitinneqartussaagaluartoq, taamani Namminersornerullutik Oqartussani atorfillit nuimanerusut iluanaarutigeqalugu malitaat, atornagu.
Ineqarnermut attaveqarnermullu aqutsisoqarfimmi pisortaq Olafur P. Nielsen ima oqarpoq:
Ilaqutariinnut arlalinnut inissiaqarfinni, tassa quleriinnik initalinni rækkehusinilu inillit inissiat ataasiakkaarlugit pisiarisinnaalerpaat. Siornatigut pisiniarnermi inissiami amerlanerussuteqartunik isumaqateqaqqaarluni pisisoqarsinnaagaluartoq maanna inissiat ataasiakkaarlugit pisiarisinnaavaat.
Ullumikkut nalinginnaasumik nalilersuinermi akigitinneqartoq malillugu pisisoqarsinnaavoq. Tamanna illoqarfinni annerumaani malunnaateqarneruvoq, soorlu Qaqortumi, Nuummi, Sisimiuni Ilulissanilu. Pingaartumik Nuummi malunnaateqarneruvoq tassanimi akigitinneqartoq nalilersuinermi annerumaalaarmat.
Peqqussummi nutaami akikilliliisoqarpoq, tassa inissiaq ukiuni tallimani najorsimagaanni akigitinneqartup 5%-ianik akikilliliisoqartarpoq. Najugaqarneq sivisunerujartortillugu akigitinneqartoq appariartortinneqartarpoq. Ukiuni 20-ini najugarisimagaanni 35%-imik akikilliliisoqassaaq.
Inissialli tamarluinnarmik Attartortumiit Piginnittumut Aaqqissuussamut ilaatinneqanngillat.
Naalakkersuisut aalajangiinerat tunngavigalugu illut inissialluunniit isaterneqariaannanngorlutik pisoqalisimasut aamma illut inissialluunniit annertuumik iluarsaattariaqartut ilaatinneqanngillat. Taamaasiortoqarpoq pisisussap akiitsorpassuaqalernissaa pinngitsoorniarlugu.
Ilaqutariinnut arlalinnut inissiani inissiamik attartortakkamik pisisut aningaasartuuterpassuaqaleriasaarnissartik ernumatigissanngikkaat pingaaruteqaqaaq.
