Atsiornerit 1190-t Asiimut tunniuppaat

Kommuneqarfik Sermersuumi meeqqerivinnut akit akisuallaarnerat naammagilerlugu internetikkut aqqusinermilu naapitanik atsiortitsiortornermi atsiornerit 1.190-t ikaarsaariarnermut ataatsimiititaliami siulittaasumut Asii Chemnitz Narupimut ullumi tunniunneqarput, taama atsiornernik katersinissamut isumassarsisoq Karen Ramsøe ilisimatitsivoq.
Allattoq Najaaraq Egede
decembarip 30-at 2008 16:21

Inuit 18-ileereersimasut angajoqqaallu ulluunerani paaqqinnittarfinniittuuteqartut ulluni 14-ini kingullerni atsiortinneqarnerannit tusindit sinneqartut peqataanerat assut nuannaarutigaat.

- Borgmesterissamut ullumi nalunaaqutaq ataatsimut tunniukkatsigit atsiortitsiortornernut qujavoq kisianni ingerlaannaq allannguisoqarnissaanut neriorsuisinnaanani, Karen Ramsøe oqarpoq.

Nuup, Paamiut, Ivittuut, Illoqqortoormiut aamma Tasiilap taakkulu nunaqarfiisa kommuneqarfissaanni ulluunerani paaqqinnittarfinnut akit ukiortaaminngaanniit assigiinngiiaartussat qanoq siunissami innissaat siulliit ilaattut misissorneqalissapput.

Kommunalbestyrelsenngortussat januaarip ulluisa 20-anni ataatsimiissallutik atsiornernik katersuisunut ilanngullugu ilisimatitsissutigaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq