WWF: Atortorissaarutinik nutaanik pissarsinissaq isumaliutigineqarli

Issittumi nunaannarmi ikuallattoqartarnera akulikilligaluttuinnarmat, ikuallattoqarneranik nakkutilliinermut akiuiniarnermullu atortorissaarutinik pissarsinissaq Kalaallit Nunaanni isumaliutigineqartariaqarpoq.

Kaare Winther Hansen, Pinngortitaq pillugu nunarsuaq tamakkerlugu suliniaqatigiiffimmi WWF-imi suliniutinik ataqatigiissaarisuusoq, Danmarkip Radioani P1-imut taama oqarpoq.

- Issittoq tamakkerlugu nunaannarmi ikuallattoqartarnera akulikilligaluttuinnarpoq, orpippassuaqarfiusuni qeriuaannartullu masarsoqarfiini.

Aasaanerani nunap panernerani ikuallattoqartarneranut inuit pissutaasinnaanerat WWF-ip ernumanartoqartippaa.

Silap kiannerulerneratigut nuna panernerulerpoq taamaattumillu ikuallattoqarsinnaanera aarlerinarnerulerluni, tamannalu pissutigalugu upalungaarsimaniarnerup allisarneqarnissaa Kaare Winther Hansenip kajumissaarutigaa.

- Taamatut ikuallattoqarneranik siusissukkut unitsitsisinnaasunik upalungaarsimatitaqartoqassanersoq isumaliutigineqartariaqarunarpoq, Kaare Winther Hansen oqarpoq.

AAMMA ATUARUK Ikuallattoq NASAmit nakkutigineqartoq

Ilaatigut qaammataasat atorlugit nakkutilliineq ajornannginnerulersimavoq, taamaaliornikkullu ikuallattoqarnera siusinnerusukkut paasineqarsinnaalersimalluni. Ikuallattoqarnerami siaruaappallaaraangat qaminniarnissaa akisuupilussuanngorsinnaavoq, Kaare Winther Hansen taama erseqqissaavoq.

Atortorissaarutinillu nutaanik pissarsisoqarnissaa isumaliutigineqartariaqarsoraa.

- Qulimiguullit atorlugit ikuallattoqarneranik akiuiniartoqarsinnaanngilaq. Akisuallaaqaaq, aamma imeq angallassinnaasaat killeqartupilussuuvoq. Taamaammat, ajornassanngippat, timmisartut suluusallit pissarsiarineqartariaqarput, taakkumi nunaannarmi ikuallattoqarneranik, siunissami amerliartuinnassagunartunik, pilertortumik qamiterinissamut atorneqarsinnaapput.

AAMMA ATUARUK Nassuttuumi ikuallannerup aavarnissaq akornuseraa

Kaare Winther Hansenip aamma oqaatigaa tuttut ikuallaffiusumiittut taamatut pisoqarnera qaangerumaaraat, piniartunulli ajornartorsiutitsivoq pujorpallaarnera pissutigalugu piniariarsinnaannginnamik.

Aamma oqaatigaa ikuallaffiusoq annertuallaalissappat,  tamanna tuttunut ukiorpat akornutaalersinnaasoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat