Som det er nu, er det kun muligt at teste for coronavirus i Grønland. Men nu er der bestilt yderligere fem maskiner, der skal placeres rundt på kysten. Arkivfoto.Assi: RitzauScanpix

Atortorissaarutinik allanik inniminniisoqartoq: Sineriammi coronamut misissuisoqarsinnaassaaq

Coronavirusimut misissueqqissaarnissamut atortorissaarutit nutaat tallimat pilersaarutit malillugit nunatsinnukaanneqassapput. Siulliit Ilulissanut, Sisimiunut Qaqortumullu tikiunneqassapput.

Coronavirusimut misissueqqissaarnissamut atortorissaarutit nutaat tallimat pilersaarutit malillugit nunatsinnukaanneqassapput.

Coronavirusimut misissuinerit tamarmik akissutersiniarlugit Danmarkimut nassiunneqaqqaartaraluarput.

Nuummilu misissuinerit misissorluarneqarsinnaalerput, maannali pilersaarutit malillugit nunarsuarmi qeqertat annerpaartaani sumiiffinni amerlanerusuni aamma misissuisoqarsinnaalissaaq.

Tamanna Naalakkersuisut nalunaajaataanni allassimavoq. Tamanna upernaakkut ataatsimiinnermut atatillugu Inatsisartut nittartagaatigut saqqummersinneqarpoq.

- Atortorissaarutinik misissuissutissanik minnerusunik tallimanik allanik inniminniisoqarpoq, taakku sineriatsinni illoqarfinni annerpaani inissinneqarnissaat naatsorsuutigineqarpoq. Atortorissaarutit taakku misissuinermut atortup annerusup Nuummi atorneqartup assinganik misisssuinermut atortoqarput, nalunaajaammi allassimavoq.

Nunatta kitaani kangianilu misissuinermut atortut

Nunarsuaq tamakkerlugu tunillaassuuttoqarnera pissutigalugu misisissuinermut atortorissaarutit nunarsuarmi tamarmi amigaatigineqangaatsiarput. Taamaammat atortorissaarutinik inniminniiniarneq ajornakusoorluni.

- Atortorissaarutinik misissuissutinillu inniminniiniarneq pisinissarlu piffissami sivisuumi ajornakusooriarluni maanna periarfissaalerpoq, Naalakkersuisut nalunaajaammi allapput.

Atortorissaarutit juunip naanerani nunatsinniilernissaat maanna naatsorsuutigineqarpoq, tunniunneqarnissaanullu ulloq aalajangersimasoq suli uppernarsarneqanngilaq.

AAMMA ATUARUK Nu kan du blive testet for coronavirus i Nuuk: Kom med ind i laboratoriet

Atortorissaarutit nutaat nunatsinnut tikiunneqartut siulliit Ilulissanut, Sisimiunut Qaqortumullu inissinneqassapput. Illoqarfinni taakkunani pingasuni najugaqavissunik marlunnik misissueqqissaarsinnaanermut ilinniarsimasoqarpoq.

Atortorissaarutit kingulliit Aasiannut Tasiilamullu inissinneqassapput. Taakkuli illoqarfinni allani tuniluuttoqalissagaluarpat aamma nuunneqarsinnaassapput.

Nunatsinnut iserlutit angalaniartut marsip ulluisa 18-iannili matoqqatinneqarput. Inuit immikkut ittumik akuerineqartut taamaallaat nunatsinnut isersinnaatitaallutik, tamannali allanngungajalissagunarpoq.

Nunatta qanoq ammariartoqqinnissaa naalakkersuisut siulittaasuata, Kim Kielsenip (S) sapaatip-akunnerata siuliani saqqummiuppaa. Aallaqqaasiutigalugu inuit 600-it sapaatip-akunneranut isersinnaatinneqassapput.

Nunatsinni nakkutigineqarsinnaanngitsumik tuniluuttoqarnissaa pinaveersaarniarlugu innutaasut coronavirusimut misissorneqarsinnaanissaat Naalakkersuisunit pingaartuutinneqarpoq. Maannakkut nunatsinni peqqinnissaqarfinni nakorsiartarfinnilu tamani maanna misissugassamik tigusisoqarsinnaavoq, illoqarfiillu pingaarnersaanni taamaallaat misissoqqissaarneqarsinnaallutik.

Misissuinissamut atortorissaarutit nutaat tallimat katillugit 3 millionit koruuninik nalileqaassapput, taakkulu sakialluummut misissuinermut aamma atorneqarsinnaassallutik

Isummersuutit