Atornikuerniarfimmi pisiat milliardimik nalillit
Ukiut qulit matuma siornatigut taassuma atornikuerniarfimmi karsit marluk 250 kr.-ilerlugit pisiarai. Maannalu karsit imaat - Amerikamiup assiliisartup tusaamasap Ansel Adamsip assilisaasa negativii 65-it 1 milliard koruuninik nalilerneqarput.
- Isumaqarpunga taakkua 1930-ikkut missaanninngaanneersuussasut, Rick Norsigian oqarpoq, negativit katillugit 65-iusut ilaat ataaseq imminerminik akimmatsitsisoq takutiitigalugu.
Norsigianip pisoqqat assorsuaq nuannarisarai atornikuerniartunukarnissanilu nuannarivittarlugu nuannersunik nassaarnissani neriuutigalugu. Ukiummi qulit matuma siornagut taamaalisoqarsimasoq oqartoqarsinnaavoq.
- Unngiaasut issiavigisartagaanik ujarleraluarpunga karsillu pisoqqat takulerlugit, Norsigian oqaluttuarpoq.
Karsiniipput assit negativitaat igalaaminiusut soqutiginarluinnarsorisai. Akii 400 kr.-iniit 250 kr.-inut apparsarpai karsillu tigullugit angerlaallugit nerriviusallu billarderfiup ataanut inissaannut inissillugit.
Qaammatit arlallit qaangiuttut negativit misissorpai isumaqalerlunilu assileeriaaseq assiliisartup tusaamasap Ansel Adamsip assileeriaasianut eqqaanartorujussuusoqm, aalajangerlunilu misissortinniarlugit. Maanna ukiut qulit qaangiummata immikkut ilisimasallit uppernarsarpaat ilumut taakkua tassaasut assiliisartup tusaamasap assilisai pinngortitamut tunngasut.
Ansel Adams 1984-imi toqusoq Amerikami assiliisartut tusaamasaanersaasa ilagaat, assilisanilu aningaasarpassuunngitsunik akilersillugit tunisarlugit. Negativit taakkua Rick Norsigianip akikinaaqalugit pisiarisimasai ukiuni 1919-imiit 1930-mut pisuusutut nalilerneqarput piginnittaatalu 1 milliard koruunit sinnerlugit iluanaarutigisinnaallugit.
