Atornikuerniarfik tunisassaaleqinngilaq

Nuummi atornikuerniarfik iserfigalugu atisakunik ulikkaavippoq atisakunillu tunisilluartarput.

- Taama oqarsinnaavunga, ukiut tamaasa isertitat qaffattarput. Maanna atornikuerniarfiup ammarneraniit ukiut 19-nit ingerlareerput. Ilimagaaralu kunngeqarfiup Danmarkip ataani isertitsinerpaasarputut. Inuiaqatigiit atisanik atuisupilussuuvugut, maanilu ilaatigut atisanik pitsaalluinnartunik pajunneqartarpugut, Aase Nygaard oqarpoq.

Natermi puussiarsuit 20-it missaanniittut iliorarneqarsimapput, sapaatillu akunneranut pajugutigineqartartut taama amerlatigisarput. Marlunngornerni arnat qulit 15-nillu akornaniittut namminneq piumasutsiminnik sulisuusut ataatsimoorlutik atisakut immikkoortitertarpaat.

- Iluamik oqaatigisinnaanngilara, kisianni tuniniakkagut tamarmik 100 koruunit ataallugit akeqarput, ikittunnguit 100 koruuneqarsinnaasarput. Assersuutigalugu qarliit 20-30 koruuninik akeqartarput, tujuuluit skuullu 30 koruuneqartinneqartarlutik. Akikitsuaqqanik tuniniaasuugaluarluta sapaatip akunneranut 12.000 14.000 koruunillu akornanni isertittarpagut, Aase Nygaard nangilluni oqaluttuarpoq.

Nuummi atornikuerniarfiup atisat pisattallu atorneeruttut amerlasoorpassuit pajugutisiarisarpaat. Røde Korsip atornikuerniarfiata inuit qinnuigai pajussagaangamik atisat pisattallu nungullarpallaarsimallutillu aseqqoqarpallaannginnissaat eqqumaffiginerusaqqullugu.

Nuummi atornikuerniarfiup atisat inissaqatinngisatik Maniitsumi Qasigiannguanilu atornikuerniarfinnut pajugutigisalerpaat.

Kommuneqarfik Sermersuumi innuttat atornikuerniarfimmik aallartitserusuttut Nuummi atornikuerniarfimmut aamma saaffiginnissinnaasut, Røde Korsip atornikuerniarfiani ulluinnarni ingerlatsisut oqarput.

Qularinngilaat ikiuussinnaanerat.