Atornerlunneqarsimasut ikiorserneqarpiarsinnaanngillat

Ilulissani atuarfimmi oqaloqatiginnittartumut siorna saaffiginnissimasut amerlanerpaartaat kinguaassiutitigut atornerlunneqarsimasuupput. Ilulissanili tarnip pissusaanik ilinniarsimasumik pissaqannginnerup kingunerisaanik atornerlunneqarsimasut annerusumik ikiorserneqarsinnaanngillat.

Ilulissani imminortartut ikilisimapput saaffiginnissutilli allat annertunerulersimallutik. Atuarfimmi oqaloqatiginnittartup Astrid Olsenip allannguutit ima saqqummiuppai:

- Annertoorujussuarmik innersuussutigisinnaavara, atorfeqartitsinermi inissisimaneq atuarfimmi atuartullu akornanni oqilisaataaqimmat. Astrid Olsen oqarpoq.

Paasissutissaq taanna aallaavigalugu Ilulissat Kommuneanni isumaginninnermut immikkoortortap pisortaanut Makka Fenckerimut paasiniaagatta meeqqat inuusuttullu sullinneqarnissaannut periarfissat nikalluallannarput:

- Kinguaassiutitigut atornerlunneqarsimasut sullinneqarnissaat kommunemit qangali pimoorullugu ingerlanneqalerpoq, siornali juuliminngaanit maannamut tarnip pissusaanik ilisimasalimmik amigaateqaratta, inuttassarsiuussisarnerugaluarpullu kinguneqanngimmat tassuuna inunnik ikiorsiisinnaanerput ajoraluartumik ingerlasinnaasimanngilaq. Magga Fencher nassuiaavoq.

Makka Fencker aamma oqarpoq, pinaveersaartitsinermut siunnersortimik sivisuumik amigaateqartoqareerluni atorfinittoqaqqinnerani kinguaassiutitigut atornerluineq pinaveersimatinniarlugu annertuumik suliniartoqalersoq.