Atornerlunneqarsimasunut anaanaq: Piffissaa killiligaanngitsumik parnaarussaanissaa eqqissiallannarpoq

juulip 01-at 2005 10:13

Angutip 52-inik ukiullip Narsap eqqartuussivianit piffissaa killiligaanngitsumik Herstedvesterimiittussanngortitaanerigaluata, nunatsinni isertitsivimmut ammasumut nuunneqarnera angajoqqaanit narrujuummissutaagaluartoq piffissaligaanngitsumik parnaarussaanissaa iluarineqarpoq.

Karoline Eliassen Tittusenip erneri pingasut atornerlunneqarsimapput:

- Tusaratsigu soorunami narrujuummeraluarpugut, maani eqqartuussiviup aalajangernera ajorinngikkaluaratsigu. Kisianni qujaqaagut killeqanngitsumik parnaarussivimmut inissinneqalermat, Karoline Eliassen Tittusen oqarpoq, nangillunilu:

- Naapikkaangatsigu qamuuna anniallannartaqaaq. Meeqqamalu illoqarfimmi takusimagaangamikku oqartarput angussuaq taanna naapissimallu. Qamuuna ilumikkut annilaartarsimannguakkuloqaat, atornerlunneqarsimasunut anaanaq taama oqarpoq.

Tarnip pissusiinik ilisimatuup, tassalu psykologip Ernst Peilmannip taama aalajangiisoqarnera pissusissamisoortutut isigaa:

- Isumaqarpunga Kalaallit Nunaata nammineerluni Inatsisinik atortitsinermut tunngasunik Danskinit tigusiartuaarnermini, pinerluuteqarsimasut pineqaatissinneqarnerat aamma isumagiartuaarmagit pissusissamisoortoq, tarnip pissusiinik ilisimasalik Ernst Peilmann oqarpoq.

Atornerlunneqarsimasut pinerliisuminnik naapitseriaannaanerat Ernst Peilmannip amerlasuutigut periaannaasarmat ajuusaarnartuunerarpaa, qanorpiarlu iliortoqarsinnaaneranik oqarsinnaanngikkaluarluni pineqaatissinneqarsimasut eqqugaasunit ungasinnerpaamut inissinneqartariaqarnerarlugit.

Nunatta Eqqartuussiviata, angut 52-inik ukiulik, Narsami nukappiaqqanik 15-it inorlugit ukiulinnik aqqanilinnik atornerluisimasutut kannguttaatsuliorfiginnissimasutullu suliareqqiinermini ippassaq aalajangerpaa piffissami aalajangigaanngitsumi nunatsinni isertitsivimmiittuussanngussasoq.