Atornerlunneqarnermi misigisapiluit qulaajarneqalerput
Ukiut sisamat qaangiupput ujarassiooq ilisimaneqarluartoq Victor McGregor tigusaanermi kinguninngua Maniitsumi isertitsivimmiitilluni imminormat. Tamanna pivoq Atammimmi Maniitsup kommuneani nukappiaqqanik kinguaassiutitigut atornerluisarsimanini pillugit unnerluutigineqareerluni.
Isertugaatit imaannaanngeqisut oqimaaqisullu suliami Victor McGregorimut tunngasut uninngaannarput, Atuagagdliutinili ippassaq saqqummersumi quppernerni immikkut sammineqarput. Ukiut 30-t ingerlanerani pisarsimasunut amiilaarnartunut tunngasumik allaaserinnittuupput tusagassiortunngorniat tallimat.
Meeqqanik kinguaassiutitigut atornerluilluni kannguttaatsuliornermut tunngasut ullumimullu suli kingunipiloqartoq allaatigisami qulaajarneqarpoq.
Ujarassiooq Victor McGregor majip 12-anni 2000-mi tigusarineqarpoq, meeqqanut minnernut kinguaassiutitigut atoqateqartarsimasutut, pinngitsaaliisimasutut kiisalu ileqqussaanngitsuliortutut pasineqarluni. Nassuereernermili kinguninngua suliaq suli eqqartuussissusilersuunneqanngitsoq juulip 6-anni Victor McGregor imminorpoq.
Suliassaq annertugaluaqisoq arlaannaalluunniit, tassa kommuniluunniit Namminersornerullutik Oqartussalluunniit suliassap qanoq annertutigineranut tunngasumik misissuisimanngillat, arlalitsigulli erserpoq ukiut 30-it ingerlaneranni meerarpassuit Victor McGregor-imit kinguaassiutitigut atornerlunneqartarsimasut.
Pisimasumut tamatumunnga nunaqarfinnguami maannamut annertuumik ajornartorsiutinik pilersitsiuarput. Maniitsup kommuneani Atammiup innuttai 6%-iinnaapput, Maniitsumili politiinit tigummineqartut affaralugit.
Suliaq ukioq 2000-mi saqqummerpoq, atornerlunneqartarsimasut ilaat Qaqiffimmi imigassartortarnini pillugu katsorsarneqarnermi nalaani Victor McGregorip eqqunngitsumik iliuuserisarsimasai oqaluttuarimmagit.
Tamanna sioqqullugu Victor McGregor nunaqarfinnguami timersornikkut siuarsaalluarnini pissutigalugu innuttaasunit ataqqineqarlunilu nuannarineqarluartuuvoq.
Atammimmi inuusuttuaqqat nerrivimmi aarsaartartutut nunatsinni pikkorinnersatut ilisimaneqarput, ullumikkulli bordtennissip arsaarartai batsitaalu timersortarfeeqqami McGregor-ip pilersitseqataaffigisimasaani pujoralatsiinnaleqqapput. Nerrivimmi arsaarartarneq soqutigineerussimavoq.
Victor McGregorip illua unnuaannakkut arlaleriarluni sequtserneqarluni piiarneqartarsimavoq, maannakkullu illup toqqaviata savimminertai kisimik takussaapput.
- Nukappiaqqat qassit McGregorimit atornerlunneqartarsimanersut naluara, kisiannili isumaqarpunga ilaasa suli isertugaatigigaat.
Qamannga kissaatigaara atornerlunneqarsimasut ammarlutik misigisimasatik oqaluttuariumaaraat, tamannami pisariaqarluinnarpoq, Mc.Gregorimit atornerlunneqarsimasut ilaat Atuagagdliutinut taama oqarpoq, neriuutigaalu Atammimmi pisimasut kingumut isiginiarneqalissasut.
