Atornerluisunik isiginnaarneq nunatsinni unitsinneqartoq

Meeqqanik kinguaassiutimikkut atornerlunneqartunik assilisanik qarasaasiaq atorlugu isiginnaartarneq nunatsinni maanna unitsinneqarpoq. Tele Greenlandip Danmarkimi naalagaaffiup politiivi ikiortigalugit nittartakkat inerteqqutaasut ulluni 14-ini immikkoortitsersimagai, Tele Greenlandip pisortaa, Anders Barslund oqaluttuarpoq:

- Naalagaaffiup politiivisa nittartakkat inerteqqutaasut immikkoortiterlugit allattugaatigai. Nittartakkamillu taamaattumik quppiiniaraanni allagarsisoqartarpoq nittartagaq taanna inerteqqutaasoq. Nittartakkat inerteqqutaasut sapaatip-akunnerata ingerlanerani arlaleriarlugit allattorneqartarput. Taakkulu Tele Greenlandimut nassiunneqareeraagata nalunaarusiortarpavut matullugillu, Anders Barslund oqarpoq.

Danmarkimi peqatigiiffiit arlallit ernummatigaat paasissutissanik ingerlatitseqqinnermi tamanna killilersuinermik aallarniutaasinnaasoq, tamanna Tele Greenlandimit qanoq isumaqarfigineqarnersoq Anders Barslund aperineqarami ima akivoq:

- Meeqqat kinguaassiutimikkut atornerlunneqartut assiginik qarasaasiaq atorlugu isiginnaartarneq inatsisinik unioqqutitsineruvoq, taamaattumik Tele Greenlandip killilersuinertut tamanna isiginngilaa, Anders Barslund akilluni taama oqarpoq.

Quppernerit 1.000-it arlaqartut Danmarkimi naalagaaffiup politiivinit akuerineqarsimanngitsut immikkoortinneqareersimapput.