Nunatsinni peqqinnissaqarfimmi atorfinittut pineqaatissinneqarssimasuunersut nalinginnaasumik misissuiffigineqarneq ajorput.
Angut Danmarkimi najugaqarnermini niviarsiaqqamik eqqaamiorisaminik atornerluisarsimasutut ukioq 2008-mi januaarip qaammataani, ukioq ataaseq isertitsivimmiittussanngorlugu pineqaatissinneqarpoq.
Niviarsiaqqamik atornerluinerit pisimapput niviarsiaraq qulit 14-illu akornani ukioqartillugu.
Nakorsap unnerluussutit akuerinagit eqqartuussivimmut Danmarkimilu landsretimut ingerlateqqittarsimagaluarpai, immikkullu ittumik maalaaruteqartarfimmut saaffiginninnerigalua itigartitsissutigineqarsimalluni.
Nakorsaq pisuutinneqarnini pillugu Danmarkimi tv-kkut aallakaatitassiamut peqataasimavoq, aallakaatitassiarlu qanittukkut aallakaateqqinneqarmat nunatsinni isiginnartartut ilaata ilisaralugu KNR-imut saaffiginnippoq.
Nakorsaq Paamiuni piffissami qanoq sivisutigisumi taartaasimanersoq aaqqissuisoqarfimmi ilisimanngilarput.
Aamma Peqqissutsimut naalakkersuisoqarfimmi pisortaq Ann Birkekær Kjeldsenip erseqqissarpaa, inunnut ataasiakkaanut tunngassuteqarmat oqaaseqarfigisinnaanagu. Peqqinnissaqarfimmili ileqqut pillugit ima oqaaseqarpoq.
- Naalakkersuisoqarfimmi sinerissamilu napparsimmaveqarfinni paasiniaaninni kangutsaatsuliornernik assigisaanillu nalunaaruteqartoqarsimanngilaq. Ann Birkekær Kjeldsen oqarpoq.
Nakorsat Kalaallit Nunaanni atorfinitsinneqaraangata pinerluuteqarsimaneri misissorneqarneq ajorput. Inatsisissatulli siunnersuutip nutaap atuutilerneratigut siunissami atorfininniarlutik qinnuteqartut 15-iliineqarsimanngitsunik atornerluisimasutut pineqaatissinneqarsimanersut takuneqarsinnaalerumaartut, Ann Birkekær Kjeldsen ilisimatitsivoq.
- Naalakkersuisut inatsisissatut siunnersuummik saqqummiussaqarput peqqinnissaqarfimmi atorfinittussat siornatigut meeqqanut pinerluuteqarsimanersut misissorneqarsinnaanngorlugit, oqarpoq.
Innuttaasut nakorsaminnut tatiginninnerat aamma innarlerneqassanngitsoq, Ann Birkekær Kjeldsenip erseqqissaatigaa.
- Innuttaasut peqqinnissaqarfimmi eqqunngitsumik pineqarsorigunik saaffiginnittarnissaat pingaaruteqarpoq, naggasiivoq.
Nakorsap pineqartup Paamiuni taartaajunnaareerpoq, peqqinnissaqarfimmilu vikaritut atorneqaqqinnissaa pilersaarutaanngitsoq Peqqissutsimut naalakkersuisoqarfimmi pisortaq Ann Birkekær Kjeldsen erseqqissaavoq.