Atornerluisimasut katsorsarneqarnissamik neqeroorfigisariaqarput
Meeqqanik kinguaassiutitigut atornerluisimasut katsorsagassatut pineqaatissinneqartalernissaat imaluunnit tarnip pissusaanik ilisimasalimmik oqaloqateqartalernissaannik neqeroorfigisarnissaat pisariaqartoq, tarnip pissusaanik ilisimasalik Ernst Peilmann isumaqarpoq.
- Siullermik eqqaamasariaqartoq, atoqateqartarneq imaaliallaannaq allanngortinneqarsinnaanngimmat, inuit atoqateqarnermut eqqarsartaasiat ilagiumasartagaallu taakkuinnangajaasarput. Taamaattumik allanngortikkuminaassinnaapput, pissusilersuutigisartakkalli allanngortinniarneqarsinnaapput. Narsap Kommuneani tarnip pissusaanik ilisimasalittut atorfilik Ernst Peilmann taama nassuiaavoq.
Assersuutigalugu oqarpoq, meeqqanik atornerluisartup piumasarnera imaaliallaannaq allanngortinneqarsinnaanera naatsorsuutigineqarsinnaanngimmat, pissusilersuutigisartagaasa allanngortinniarnissaat aqqutaasinnaasoq, soorlu atornerluinissamik eqqarsaateqalerssilluni imminut unitsissinnaalernissaa anguniarneqarsinnaasoq. Taamaattumik pineqaatissiisarnernut ilanngullugu katsorsaanissamik imaluunnit tarnip pissusaanik oqaloqateqartalernissamik neqerooruteqartalernissaq piffissanngorsoraa.
Narsap kommuneani tarnip pissusaanik ilisimasalittut atorfillup Ernst Peilmannip taama oqariartuuteqarneranut tunngaviusoq tassaavoq, Narsami angut 52-nik ukiulik nukappiaqqanik aqqanilinnik kinguaassiutitigut atornerluisimasutut Narsap Eqqartuussiviani sapaatip-akunnera kingulleq eqqartuunneqarnerata kingunerisaanik. Angut pineqartoq parnaarussivimmi tarnit nakorsaannik siulersorneqartumut, tassalu Herstedvesterimut piffissami sivisussusiligaanngitsumi inissitassanngorlugu pineqaatissineqaraluarpoq, angulli Nunatta Eqqartuussivianut suliassanngortitsimmat, suliaq suli naammassillugu aalajangersaavigineqanngilaq.
Angut pineqartoq Aasianni nukappiaqqanik 27-nik 1998-imi atornerluisimasutut siornatigut aamma pineqaatissinneqarsimavoq, politiillu unnerluussisut taamani piumasarisimagaluarpaat pineqartoq Danmarkimi piffissami aalajangersimasumik sivisussusiligaanngitsumi katsorsagassanngorlugu inissinneqassasoq. Angutilli Nunatta Eqqartuussivianut taamani suliassanngortitsineratigut pineqaatissiissut allanngortinneqarpoq, nunatsinni ukiuni pingasuni isertitsivimmiittussanngorlugu.
Angutip pineqartup pineqaatissinneqarnini tigoreersimavaa isertitsivimmeereersimallunilu. Taamaakkaluartorli Narsami nukappiaqqanik aqqanilinnik atornerluisimasutut maanna unnerluunneqaqqippoq.
Inatsisartut upernaakkut ataatsimiinnerminni aappassaaneerlugu oqaluuserisassaasa ilagaat, pisortat suliffeqarfiutaanni meeqqanik inuusuttunillu sullissiviusuni atorfinitsitsinissaq sioqqullugu, atorfinittussaq pillugu paasissutissanik pinerluuteqarsimasunut tunngasunik aallernissamut akuersissuteqalernissaq. Taamaaliortalernissarlu piffissanngortoq Ernst Peilmann oqarpoq.
