Atornerluisarsimasup tigummigallagaanera sivitsoqqinneqarpoq
juunip 15-at 2006 05:15
Nuummi meeqqanik atornerluisarsimasutut pasineqartup tigummigallagaanera, qaammatini pingasuni sivitsoqqinneqarpoq.
Politiinit tigummigallarneqarnerata sivitsorneqarneranut patsisaavoq, pasineqartup eqqarsartaatsimigut qanoq issusaa misissorneqassammat.
Angut pineqartoq, meeqqanik atornerluisarsimasutut pasineqarluni, marsip qaammataani politiinit tigusarineqarpoq.
Angut meeqqanik atornerluisartutut pasisaq, sapaatit akunnerini sisamani tigummigallarneqassasoq, nunatta eqqartuussivianit marsip ulluisa 24-anni aalajangerneqarpoq, taamanimiilli tigummigallarneqartarnera sivitsorneqaqattaarpoq.
Meeqqat pillugit paasissutissanik politiit oqaluttuarusunngillat, misissuineq suli ingerlammat.
