Atornerluinerit qassiunersut naatsorsorneqarput
Inuit 205-it maanna Tysklandimi oqartussaasunut attaveqarsimapput oqaluttuarlutillu mattuttunit jesuit-init sullissiveqarfinni atornerlunneqartarsimallutik.
Jesuit-it ilagiinni katuuliusuni pitsaanerpaamik inissisimasutut taaneqartarput atuarfinnillu Tysklandimi angajoqqaat meeqqamik atuarfigisartagaannik aningaasarpassuarnillu akiliuteqarfigisartagaannik assigiinngitsunik ingerlataqarlutik.
Tysklandimili jesuit-ini piisaarneq qaangiukkiartulersimavoq atornerluisarnermik suliassat imaaginnavillutik takkussulersulli. Inuit katillugit 46-t aqqi taaneqartut tassaasut palasit sulisullu allat jesuit-it sullissiviini atornerluisarsimasutut unnerluutigineqarput.
Ursula Rau misissuinermik suliaqartoq oqarpoq, inuit atornerlunneqarsimasut nammineq nalunaarusiami tigummisaminiittumi allassimasuninngarnit qularnanngitsumik amerlanerussasut, tamatumunngalu peqatigitillugu erseqqissarlugu, kinguaassiuutitigut atornerluinerit amerlaqisut jesuit-it ukiuni qulikkuutaani aaqqissuussamik isertuunniarsimagaat.
