Atornerluineq pillugu misissuisoqarsinnaanngorpoq
Naalakkersuisunut ilaasortaasimasut marluk ilassinnissutinik atornerluisimanerannik paasiniaaneq politimester Anders Linnet-ip aallartinnialerpaa. Paasiniaanissaminut inatsisartut siulittaasoqarfiata akuersinissaa utaqqigaluariarlugu, pisortamit Nikolaj Sørensen-imit nalunaarfigineqarpoq inatsisartut akuersiteqqaanngikkaluarlugit suliaq aallartinneqarsinnaasoq.
Jens Napaattuup Rasmus Frederiksen-illu ilassinnissutinik atornerluisimasinnaanerinik misissuinermi aningaasanik pinerluuteqarsimasunut inatsit atorneqartoq toqqammavigineqassaaq.
-Inatsisartunut, naalakkersuisunullu ilaasortaasimasut, massakkullu ilaasortat, aningaasanik pinerluuteqarsimasunut inatsit tunngavigalugu eqqartuunneqarsinnaapput. Pinerluttulerinermi inatsit
§ 21 tunngavigalugu pinerluttutulli allatut inatsisitigut malersorneqarsinnaasut, Nikolaj Sørensen-ip erseqqissarpaa, nangillunilu:
-Naalakkersuisunulli ilaasortat naapertuuttumik inatsisit eqqortillugit, uniorlugilluunniit suleriaaseqarsimanersut paasiniarneqassappata inatsisartut saaffiginnissuteqaqqaartariaqarput.
Atorfillit unioqqutitsisimallutik malersorneqartarnerattut
naalakkersuisunut ilaasortat akisussaaffimminnik
sumiginnaasimasutut inatsisitigut malersorneqarsinnaanngillat. Taamaattumik naalakkersuisunut ilaasortaasimasut ilassinnissutinik atornerluisimaneragaanerat inatsisartuni ilaasortamit ataatsimilluunniit saaffiginnissutigineqanngimmat politimesterip suliaq aallartissinnaanngikkaa, Nikolaj Sørensen nassuiaavoq.
Soorunami kingusinnerusukkut Inatsisartunit naalakkersuisuusimasut malittarisassat uniorlugit suliatik ingerlattarsimaneraat paasiniaqqullugu saaffigineqarutta, politimestereqarfik nalunaarfigissavarput, Nikolaj Sørensen oqarpoq.
Qularutiginnginnerarpaa suliami aalajangiisoqannginnerani inatsisartut paasissutissanik erseqqinnerusunik pissarserusussasut.
-Taamaliorsinnaappullu ukiumi naatsorsuiffimmi 2004´mi landskarsip naatsorsuutai saqqummiunneqarpata, Inatsisartut allattoqarfiani pisortaq Nikolaj Sørensen naggasiivoq.
