Kinguaassiutitigut atornerluinerit kinguaariit ingerlaneranni piuarnerat nunatut ajorluinnartumik ajornartorsiuittutullu inissisimatitsivoq. Inuunerit sequminneqartarput, inuit atornerluisunngortarput imminornerillu pisarlutik, tamannalu nunatut ajornartorsiuittutut inissisimalersitsivoq, Aaja Chemnitz Larsenb oqarpoq. Asseq: ScanpixAssi: Scanpix

Atornerlugaasunut ikiuigasuarnissamut aningaasaateqarfiliornissaq Aaja Chemnitzip siunnersuutigigaa

Nuna tamakkerlugu ajorluinnartumik inissisimasoqarnera qaangerneqartariaqalerpoq, Inuit Ataqatigiit qinigassanngortitaat taama isumaqarpoq. Meeqqanut inuusuttunullu atornerlunneqartunut ikiuigasuarnissamut aningaasaateqarfimmik pilersitsisoqarnissaa siunnersuutigaa.

Meeqqat inuusuttullu kinguaassiutitigut kannguttaatsuliorfigineqartarnerat pillugu suliniuteqarneq ikiuigasuarnissamut aningaasaateqarfimmit qulakkeerneqassaaq.

Aaja Chemnitz Larsen, Inuit Ataqatigiit sinnerlugit Folketingimut qinigassanngortittoq taama siunnersuuteqarpoq.

- Aalisartut ikiorasuarneqarnissaannut aningaasaateqarfiliorsinnaagutta, taava sooq meeqqanut atornerlunneqartunut taamatut pilersitsisinnaassanngilagut, Aaja Chemnitz Larsen oqarpoq nangillunilu:

Pineqartoq naatsumik
- DR-ip piviusulersaarutaa "Byen hvor børn forsvinder" Tasiilamut tunngassuteqarpoq.
- Tasiilami meeqqat pingasuugaangata ataatsip kinguaassiutitigut atornerlugaasimasarnera meeqqallu marluugaangata ataatsip kommunip isumaginnittoqarfianut suliassanngortinneqarsimanera piviusulersaarummi saqqummiunneqarpoq.
- Piviusulersaarutip kingunerisaanik Tasiilami nunattalu sinnerani isumaginninnikkut ajornartorsiutit kingumut oqallissaaqqilerput.
- Illuatungiliuttut partiillu tapertaasut Demokraatit aalajangiiffigisassatut siunnersuummik pingasunngormat saqqummiussipput: Naalakkersuisut isumaginninnikkut ikiorneqarnerunissamik Danmarkimut noqqaassuteqarnissaart piumasaqaatigaat. - Taamatut piumasaqaateqartoqarnera Naalakkersuisut mtaasinngornermi maajip 27-ani akueraat.

- Kinguaassiutitigut atornerluinerit kinguaariit ingerlaneranni piuarnerat nunatut ajorluinnartumik ajornartorsiuittutullu inissisimatitsivoq. Inuunerit sequminneqartarput, inuit atornerluisunngortarput imminornerillu pisarlutik, tamannalu nunatut ajornartorsiuittutut inissisimalersitsivoq.

Angalatitat aamma pineqaatissiinerit pilertornerusut

Ikiuigasuarnissamut aningaasaateqarfiup kinguaassiutitigut atornerlugaasimasut aningaasatigut tapersersuinissaa siunnersuutigaa. Tamannalu assersuutigalugu uligasuartitatut angalatitsisarnikkut pisinnaavoq. Danmarkimit aningaasatigut taperserneqarnikkut meeqqanut illut meeqqanut sumiginnakkanut atornerlunneqarsimasunullu katsorsaaffiusinnaasut aamma pilersinneqartariaqarsorai. 

Aamma eqqartuussivikkut suliat pilertornerunissaat atornerluisutullu nassueruteqarnermi ingerlaannartumik pineqaatissinneqartarnissaq Inuit Ataqatigiit sulissutiginiarpaa.

Angajoqqaatut piginnaasat qaffassarnissaannut ilaqutariinnut marluk angullugit ukiulinnik meerartalinnut ilitseruisoqartalernissaa Inuti Ataqatigiit aamma siunnersuutigaat. Meeqqat ornittagaasa meeqqallu illuisa meeqqanut sumiginnagaasunut atornerlugaasunullu ulloq unnuarlu ammasinnaanngortinnissaat akissarsinerullu nalaani orniguffissatut inissinnissaat partiip aamma siunnersuutigaa.

AAMMA ATUARUK Martha Abelsenip Tasiilaliarnissani aalajangiusimagaa

-  Inoqarfippassuarni inunnut ikiuinikkut ikiortariaqavissutut sivisuumik inissisimasoqarsimavoq, soorlu Tasiilami, aammalumi sumiiffinni allani tamanna takugipput, Aaja Chemnitz Larsen taama oqarpoq.

Tasiilami kinguaassiuutitigut innarliinerit

Tasiilami pigisaanilu kinguaassiuutitigut pinerliinerit ukiut pingasut kingulliit ingerlaneranni 193-it nalunaarutigineqarput.

Meeqqanut kinguaassiuutitigut atornerluinerit 20-t siorna nalunaarutigineqarput.

Tasiilami pigisaanilu meeqqanut kinguaassiuutitigut pinerluttuliornerit 15-it maanna suliarineqarput.

Meeqqat illersuisuata aamma nalunaarutigaa nalunaarutigineqarsimanngitsut amerlasoorujussuusut.Agguaatigiissillugu meeqqat pingasuugaangata ataaseq kinguaassiutitigut atornerlugaasarpoq, meeqqallu marluugaangata ataaseq kommunemi isumaginninnikkut suliassaasarpoq.

Danmarkip Radioata piviusulersaarutaata "Byen hvor børn forsvinder"-ip (Illoqarfik meeqqat qimagussorfiat, aaqq.) aallakaatinneqarnerata kingorna meeqqanik sumiginnaasarneq annertuumik oqallisaaqqilerpoq. 

Ikiorneqarnissamut pisinnaatitaaffeqarneq

Tasiilami meeqqat pingasuugaangata ataatsip kinguaassiutitigut atornerlugaasimanera, meeqqallu marluugaangata aappaata kommunimut suliassanngortinneqarsimanera piviusulersaarummi saqqummiunneqarpoq.

Nalunaarusianilu ukiut arlallit ingerlanerini saqqummiunneqartartut piviusulersaarummi aamma sammineqarput: Tasiilami kannguttaatsiorfigineqartut imminnullu toqunnissamik eqqarsaateqartut sullinneqarnerat nalunaarusiani arlalinni isornartorsiorneqarpoq. Tamannalu Inatsisartunut siorna qinersisoqarmat aamma oqallisigineqartupilussuuvoq.

AAMMA ATUARUK Kangerlussuarmi sakkutuunngorniarfeqalernissaa Siumup qinigassanngortitaata siunnersuutigigaa

Tasiilami nunattalu sinnerani isumaginninnikkut ajornartorsiutit annertuut pillugit Danmarkimit ikiorneqarnissamik Naalakkersuisut noqqaassuteqarnissaat partiit amerlanerussuteqartut piumasaraat. Tamannalu Naalakkersuisunit akuerineqarpoq, qanorpiarli ikiuisoqassanersoq suli erseqqissumik oqaatigineqanngilaq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat