Atornerlugaasimasoq: Isertugaateqarluni peqqinnanngilaq
Nunatsinni Inuiaqatigiilerinermik Sammisallit suleqatigiiffiata ippassaq aallarnisarnerani meeqqat inuusuttullu kinguaassiutitigut atornerlunneqartarsimasut oqallisigineqartunut ilaapput.
Angut meeraalluni angummit atornerlunneqarsimasoq isertugaateqarnini pillugu kamassaqarsimaqaaq. Sakkortuuliortarsimavoq, aangajaarniutinik atornerluisuulluni imminoriartarlunilu.
- Meeraalluni kinguaassiuutitigut atornerlunneqarsimasuulluni pisimasoq soorlu ippassaq pisoq, tassa taama misigisaq uannut sakkortutigaaq. Taama oqarpoq Erneeraq West, 32-inik ukiulik, aqqanilinnik ukioqarluni angummit atornerlunneqaqqaartoq, ukiorpassuarnilu atornerlunneqartarsimanerminik isertuussisimasoq.
-Tassami uanga ukiuni taakkunani atornerlugaareernerma kingorna ima isertuutsisigimagakku ilaquttama tungaanut, kisianni timima pissusaa – kropssprog –atorniartarsimagaluarlugu, avatangiisinnut paaseqqusaarlunga. Paaseqqusaarneq sakkortuuliorlunga amma 13-inik ukioqarlunga imigassamik ikiaroornartumillu atuisalerlunga. Ikiaroornartartut atornerlukkunnanngimmannga, atornerlunneqarsimasoq oqarpoq.
-Atorfissaqartinnerpaasimagaluarpara misigissutsip anninnissaa, qamani toqqortara: Atornerlugaasimanera angumminngaanniit. Kisianni taamaaliorsimanngilanga, imaaliorsimavunga, imigassamik ikiaroornartumillu taakku misigissutsit matoorsimavakka. 2003-mi Qaqiffimmi katsorsartinninni aatsaat allamut oqaluttuarpunga.
Misigissutsit anniseqqaarakkit kamak annertoorujussuaq anisimavoq, aninerani sunarparujuit takkussuullutik. Ikiaroorusunnersuaq imminorusunneq atuisutoqqap Erneeqqap pissusilersuutai takkussuullutik. Iperarusunnginnamikku taanna kamak, oqarpoq.
Erneeraq West Qaqiffikkamili ullumimut imminut suliariuarpoq, taamaattumillu AA-mi ikorfartortini ataatsimiigiartarninilu pinngitsoorsinnaanagit.
Assingusumik misigisaqarsimasut oqaloqatigiittarfiat aamma amigaataasoraa.
Angut Erneeraq Westimik meeranerani atornerluisimasoq meeqqanik allanik atornerluisarsimanini pillugu ullumi pinerluuteqarsimasunut isertitsisarfimmiippoq.
