Atorluaaneq namminersulernissamut ammaassissaaq
Nunanut allanut tunngassuteqartunut Naalakkersuisoq, Aleqa Hammond, tuluit aviisiannut, The Guardianimut, taama oqarpoq.
Uuliasiorneq aatsitassarsiornerlu Kalaallit Nunaanni annertusiartortillugit Aleqa Hammond neriuppoq Kalaallit Nunaat ima pisuunngortigissasoq Danmarkimiit ikiorsiissutinik pisariaarutissasoq.
-Namminersulernissaq kialuunniit soorunami kissaatigisarpaa. Europamut atasutut misigisimanngilagut. Issittormiuuvugummi. Danmarkimiit tapiiffigineqartarnerput suli pinngitsoorsinnaanngilarput, pinngortitalli pissarititaanik atuilluarutta tamanna allanngortissinnaavarput, aningaasatigut politikkikkullu kiffaanngissuseqalersinnaalluta, Aleqa Hammond aviisimut oqarpoq.
Aviisimili allaaserisami takuneqarsinnaavoq isummamut tassunga kalaallit assigiinngitsumik isumaqartut. Soorlu Københavnimi Universitetimeersoq, ilisimatooq Minik Rosing, unneqqarilluinnarluni oqarpoq, uuliamik aatsitassanilluunniit peqarluarneq kiffaanngissuseqalernissamut aqqutiginiarneqassappata tamanna isumassarsialattut nammineq takorloorsinnaanagu.
- Inuiaqatigiinguit taama ikitsigaluta, kiffaanngissuseqaleruttalu tamanna sumut iluaqutaassava? Ikinnguteqarutta taakkununngalu atalluarluta ajunnginnerpaavoq, Minik Rosing oqarpoq.
Aqqaluk Lynge, Inuit Issittormiut Siunnersuisoqatigiiffianneersoq, tuluit aviisiat naapertorlugu aamma nangaassuteqarpoq:
-Eqqortumik oqassaguma namminersulernissatsinnut piffissaq suli sivisoqaaq. Akerleriissuteqarneq pinaveersaartariaqarparput pissuussutinillu atuilluarneq paasilluartariaqarparput, taamaaliortinnata aalajangiisinnaanngilavut, Aqqaluk Lynge aviisimut The Guardianimut oqarpoq.
