Atorfinni qaffasinnerusuni arnat suli ikinnerupput

Arnat allaffimmiutut atorfillit kommunini amerlanerugaluaqisut, qaffasinnerusuni atorfillit suli ikinneroqaat. Tamannalu arnat meeqqiornerminni akisussaaffimmik angisuumik tiguserusuttannginnerannik patsiseqarsinnaasoq, Sisimiut Kommuneanni, kommunemi pisortaaneq, Paneeraq Olsen isumaqarpoq:

- Siornatigut arnat angerlarsimasuusimapput, massakkullu qujanartumik arnat amerlasuut ilinniagaqartalermata maani aamma arnarpassuit sulisoraavut. Arnat atorfinni qaffasinnerusuni amerlanerunnginnerat patsiseqarsoraara, arnat meeqqiornermik nalaanni akisussaaffimmik annertunerusumik tiguserusuttannginnerannik, Paneeraq Olsen oqarpoq.

Paneeqqallu ilimagaa Ilisimatusarfimmi arnat ilinniartartut amerlanerunerisa, arnat qaffasinnerusuni atorfeqartartut amerlisikkumaaraat.

Emilie Brønlund, Ilulissat kommuneanni allattoqarfimmi pisortaq isumaqarpoq, immikkoortortaqarfiit sorliit pineqarnersut apeqqutaalluni arnat angutillu agguataarsimasartut:

- Allaffissornerit inunnillu isumaginninnermut tunngasut isigissagaanni taakkunani sulisut arnaanerusarput. Teknikkimut tunngasuni, soorlu ingeniørit byggeteknikerillu angutaakkajunnerupput, Emilie Brønlund oqarpoq.

Immikkoortortaqarfinni suliffiusuni arnat angutillu suleqatigiilluartarmata, arnat amerlanerussuteqarnermikkut annertunerusumik nikitsitsisarnerat, Paneeraq Olsenip Emilie Brønlundillu ilimaginngilaat.

Sisimiut kommuneani sulisut pingasuugaangata ataaseq angutaasarpoq, Ilulissat kommuneani ikinnerullutik, sulisut tallimaagaangata ataaseq kisimi angutaasarluni.