Atorfillit tattoqisaappallaarput

Nunatsinni pisortani atorfillit amerlavallaarput, taamaattoqarneralu sulisinnaanermut sulianillu tunniussisinnaanermut ajoqutaavoq.

Atorfillit Kattuffianni siulittaasoq Erik Hammeken ukiortaami oqaaseqarnermini taama allappoq.

Atorfillit Kattuffianni ilaasortat amerlanersaat pisortani, namminersornerullutik Oqartussani kommuninilu atorfeqartiterput.

- Pisortani allaffissorneruleriartorneq sulisoqarnerulersitsivoq, taamaasillunilu sulisut tattoqisaanneruleriartorlutik. Tamanna sulisut suliaminnik toqqissisimallutik sulisinnaaneranut innarliivoq, tamanna sulisut naammassisinnaasaasa, suliarisallu pitsaassusianut ajortup tungaanut sunniuteqartoq, Erik Hammeken oqarpoq, nangillunilu: - ukiuni kingullerni sulisut amerliartornerat ilutigalugu nalaanneqallattaaleraluttuinnartut ilagaat, sulisut tarnikkut kalluarneqaatigisaannik qaninnertut qullersarisat pissusilersortarnerat. Assersuutigineqartunut ilaapput, sulisunut qarsupittumik pissusilersornerit, sulisunut ataasiakkaanut ingasattumik suliakkersuinerit, suleqatit tusaasut nikanarsaanerit assigisaallu.

- Taamaattoqartillugu sulisut napparsimakulalersarneri naliginnaalersarpoq, amerliartuinnarpullu nakorsamit allagartamik pillutik sivisuumik sulisinnaajunnaarallartartut, tamannalu sulisitsisunut akisuujuvoq, Erik Hammeken ukiortaami oqalugiaammini ilaatigut taama allappoq.

Atorfillit Kattuffiata ukioq 2005-imi suliat marluk Nunatta Eqqartuussivianut ingerlateqqippai, eqqartuussinernilu taakkunani marlunni, Atorfillit Kattuffiat ajugaavoq. Suliani allani pingasuni eqqungitsumik soraarsitsisimanerni nammineerluni suliat inaarnissaanik isumaqatigiissuteqarnerni sulisitsisut aningaasanik taarsiissuteqarput.