Umiarsualiviit nutaat Atorfillit suliat tuaviuussat pillugit imminnut isornartorsioqatigiittut

Naalakkersuisut sivikitsumik tusarniaanerminnik arlerlutillu inatsisissatut siunnersuummik suliaqarnerminnik isornartorsiorneqarput. Maannalu allamik aamma ilanngussisoqarpoq.
Assi © : KNR // Anton Gundersen Lihn
decembarip 25-at 2017 14:12

Transparency International Greenland, Demokraatit Hans Enoksenillu Partii Naleqqameersup Naalakkersuisut suliat assigiinngitsut Inatsisartuni tuaviortumik suliarineqarsimasut pillugit isornartorsiorsimavaat.

Tamatumani ilaatigut aalisarnermut inatsit, mittarfinnik sanaartornissamut sulisussat tikisitat akileraartarnissaat pillugu nutaamik inatsisiliornissaq, imigassamut inatsip nutaat aappassaaneerneqarnera pingajussaaneerneqarneralu ilaapput.

Suliaq kingulleq isornartorsiorneqartoq KNR-ip illutaassaanut aningaasanik immikkoortitanik allatut agguaanermi Qaanaami, Uummannami Kangerlussuarmilu umiarsualiornissamut immikkoortinneqarnerannut tunngassuteqarpoq.

Kultureqarnermut Naalakkersuisoqarfik suleqatiminnut Attaveqaqatigiinnermut Naalakkersuisoqarfimmut tusarniaanermut akissuteqarnerminni sakkortuumik akissuteqarlutik suliamik piffissami sivikitsuinnarmik periarfissinneqarsimanertik isornartorsiorpaa.

Kultureqarnermik Naalakkersuisoqarfik oktobarip 31-ani nalunaaqutaq 15.54 tusarniaanermut akissuteqaqquneqarpoq. Akissuteqareernissamut piffissaliussaq tassaavoq novembarip aappaat nalunaaqutaq 12.00.

- Siullertut naalakkersuisoqarfiup tusarniaassutip 48 tiimiinnarnik piffissalerneqarsimanera ajuusaarnartippaa. Pingaartumik aningaasat taama annertussuseqarneranut tunngammat ajuusaarnarpoq, Kultureqarnermik Naalakkersuisoqarfik akissuteqarnermini allappoq.

Naalli suliap ingerlanera isornartorsiorneqaraluartoq arliillu aningaasanik nuussinissamut ernumanartikkaluaraat Kultureqarnermut Naalakkersuisoqarfik aningaasat umiarsualiviliornissanut nutaanut aningaasaliissutinngorlugit, 49 millionit koruunit missaanniittut kontumiit kontumut allamut nuunneqarnissaannut akuersipput.

Isornartorsiorneqaqqittut

Inatsisilli tuaviuussamik suliarineqarnerat tusarniaanerillu sivikitsuinnarmik piffissalikkat aatsaat siullermeertumik isornartorsiorneqanngillat.

Naalakkersuisut aningaasanut inatsip akuerineqarnissaanut Aningaasaqarnermut Akileraartarnermullu ataatsimiititaliaq inatsit nutaaq, mittarfinnik sanaartortoqarnissaanut, avataaniit suliartortinneqartussat akileraarutissaannut malittarisassaq pillugu tusarniaaffigaa.

Ataatsimiititaliaq tusarniaanermut akissuteqarnissamut akunnernik arfineq-marlunnik periarfissinneqarpoq. Ataatsimiititaliami akerlisoqaraluartoq siunnersuut akuerineqarpoq.

- Tusarniaaffigineqartut akissuteqarnissaat isumaqassappat suliarilluakkamik eqqortumillu tusarniaasoqarnissaa pisariaqarpoq, ataatsimiititaliaq taama isornartorsiuivoq.

Ukiami ataatsimiinnermi tuaviuussamik inatsisinik pingaaruteqartunik suliarinninnerit arlariit Transparency International Greenlandimit Demokraatiniillu aamma isornartorsiorneqarput. Naalakkersuisullu aamma isornartorsiuipput.

- Naalakkersuisut Inatsisartullu siunnersuutinik suliarinninnermi piffissaqarnerusariaqaraluarput kiisalu partiit oqaloqatigiinnissaminnut minnerunngitsumillu inuiaqatigiinni susassaqartut, innutaasut peqatiigiffiillu suleqataanissaat piffissaqartariaqarluni, Naalakkersuisoq, Hans Enoksen ukiami ataatsimiinnerup naammassineqarneranut atatillugu oqarpoq.

AAMMA ATUARUK Ataatsimiititaliap Naalakkersuisut inatsisaat tuaviuussaq avoqqaaralugulu akuerigaa

AAMMA ATUARUK Inatsit tuaviuussaq tusarniaassutigineqassasoq