Atorfillit Kattufiata Kommuneqarfik Sermersooq unnerluutigaa
Suliassaq 2008-mi taamanikkut Nuup Kommuniani aallartippoq, tassa Atorfillit Kattuffiannut ilaasortaq utaqqiisaasumik ineqartitaanerminut akileeqquneqarnerminik naammagittaalliormat. Pineqartoq Nuup Kommuniani sulilinngikkallarami sulisitsisumi allami atorfeqarpoq, tassanilu atorfimminut atatillugu ineqartitaalluni. Inigisanili Nuup Kommuniani atorfinikkami qimattariaqarlugu.
Nuup Kommuniata atorfeqarneranut atatillugu inissaanik ingerlaannarluni tunisinnaannginnamiuk utaqqiisaagallartumik inissaanik tunivaa. Taamaattorli Nuummi najugaqareernera pissutigalugu, utaqqiisaagallartumik inigigallagaanut akiliuteqartittarlugu. Atorfilik ilisimatinneqarpoq, illoqarfimmi allami najugaqarluni Nuup Kommuniani sulilernissani pillugu nuuttariaqarsimasuuguni, utaqqiisaagallartumik inigisaminut akiliuteqartinneqartarsimanavianngikkaluartoq.
- Tamanna sulisumik sumi najugaqarneq tunngavigalugu immikkoortitsineruvoq aamma Inatsisartut peqqussutaanik unioqqutitsinerulluni, tassanimi allassimavoq utaqqiisaagallartumik inissiinermi akiliuteqartitsisarneq periarfissaqanngitsoq, Atorfillit Kattuffiata siulittaasua Erik Hammeken oqarpoq.
Kattuffiup ilaasortat allat aamma taama pineqartarsimanissaat ilimagaa, taamalu pisortarsimassappat ilaasortat kattuffimmut saaffiginneqqullugit kajumissaarneqarput.