Atorfilinnut inatsiseqalissaaq
Atorfilinnut inatsisissatut siunnersuut Namminersorlutik Oqartussat isumaqatigiinninniarnermut immikkoortortaqarfiata tusarniaavigaa. Pilersaarutillu malillugit siunnersuut 2012-mi Inatsisartut upernaakkut ataatsimiinneranni oqaluuserineqassaaq.
Atorfilinnut inatsit illersuinermut inatsisaavoq, atorfilinnut qaammammusialinnut pisinnaatitaaffinnik assigiinngitsunik illersuisussaq - soorlu sulinngiffeqarnerup napparsimanerullu nalaani aningaasarsiaqarneq, soraarniarnermi soraarsitsinermilu piffissat nalunaaruteqarfissat.
Sermitsiami allaaserisaq naapertorlugu inatsisissatut siunnersuutip amerlanertigut qallunaat inatsisaat malippaa, pissutsinili arlalinni siunnersuut nunatsinni pissutsinut naleqqussarneqarsimalluni.
Erninermut atatillugu sulinngiffeqarnermut malittarisassat suli sulisitsisoqarnermi illuatungiliuttuni isumaqatigiinninniutaasassapput.
Kalaallit Nunaat 1979-imiilli atorfilinnut malittarisassaqarsimavoq, akerlianilli ileqquusimalluni qallunaat atorfilinnut inatsisaanuinnavik innersuussisarneq.
Ilaatigut tusarniaavigineqarput sulisoqartarnermi illuatungeriit, akissuteqarnissamullu killissarititaavoq aggustip 9-at, Sermitsiaq allappoq.