Atorfilik Sankt Helenameersoq nunatsinneereerluni isumalluartoq

Qeqertaaqqap Sankt Helena-p oqartussaasuini atorfilik sapaatit akunnerini pingasuni nunatsinneeqqammerpoq, takornariaqartitsineq inuussutissarsiutinillu ineriartortitsinerit paasiniaavigisimallugit.

Glenn Owen inuussutissarsiornermut pisortaqarfimmiissimavoq, tamaaniissimanerminullu atatillugu inuttaa isumalluartorujussuuvoq:

- Inuussutissarsiutitigut ineriartortitsinerit Kalaallit Nunaanni periuserineqartut paasiniaavigiartorsimavakka, suliffeqarfinnillu aallarnisaaniartut qanoq ikiorneqartarnersut paasiniaavigisimallugu. Paasisakka Sankt Helena-mi atorluarneqarsinnaassasut neriuutigaara, Glenn Owen oqarpoq, nangillunilu:

- Nuuk assut assersuutissaqqippoq. Tamani tamaani sanaartortoqartoq malunnarpoq, aningaasaqarniarnikkullu ingerlalluartoqartoq malunnarluni, Glenn Owen oqarpoq.

Suliffeqarfissuilli nunat tamalaani ingerlataqartut soorlu Alcoa-tut ittut, Sankt Helenamit suleqatigineqarsinnaassagunanngitsut aamma oqaatigineqarpoq. Sankt Helenamimi piiaaveqanngillat, qeqertarlu mikisunnguulluni, Glenn Owen oqarpoq.

Inuussutissarsiutitigulli ineriartortitsisoqartariaqarpoq. Innuttaasut ikiliartuinnavissimapput. 2002-p siorna innuttaasut 6500-t missaanniissimapput, maannalu 3600-t missaannaanniilersimallutik.

Amerlanerit tuluit amerikamiullu sakkutooqarfiini qeqertani allaniittuni suliffeqarput.

Sankt Helenami mittarfeqanngilaq, avammullu attaveqarfituaq tassaalluni illoqarfiup Jamestownip umiarsualivia.

2012-imili mittarfeqalernissaq siunniunneqarpoq:

- Mittarfik naammassineqarpat takornariat amerlinissaat neriuutigaarput, aningaasaqarniarnerpullu ilorraap tungaanut sangutinneqarnissaa neriuutigalugu, Glenn Owen naggasiilluni oqarpoq.

Nunat OLT-mi ilaasortaasut siorna ataatsimiinneranni Sankt Helenap nunattalu akornanni isumaqatigiissutigineqarpoq annertunerusumik suleqatigiittoqassasoq.