Atoqatigiinneq pillugu KNR-TV-kkut aallakaatitassiat qulit

Tusagassiortup Nûno Isbosethsenip Paarisa suleqatigalugu TV-kkut takutitassiai "Nûno Tutillugu"-mik taaguuteqartut, sapaatit tulleriit qulit KNR TV-kkut takutinneqassapput.

- Atoqatigiinneq ammanerusumik oqaloqatigiissutigigaanni immitsinnut paarinerussaagut, Sofie Jessen Paarisamit oqarpoq.

Nûno Isbosethsen takutinneqartussat pillugit ima oqarpoq:

- Qanoq ililluni nuannernerusumik atoqatigiittoqarsinnaanersoq, killissallu sumiinnersut, TV-kkut radiukkullu aallakaatinneqartussani oqaluuserineqassapput. Atoqatigiinnermi misigissutsinik qanoq ineriartortinneqarsinnaanersoq peqqissumillu atoqatigiittarneq kalaallit qanoq isigineraat, aallakaatitani sammineqartussat ilagaat, taamatullu atoqatigiinneq pillugu oqaasertalersuinissap pingaaruteqarnera sammineqassalluni.

Kinguaassiuutitigut nappaat Clamydia inuusuttut akornanni nappaatigineqartoq oqaatigineqartarpoq, tassunngalu tunngatillugu Sofie Jessen oqarpoq, kinguaassiuutitigut nappaat clamydia siammasissumik atugaasoq, tassalu inuusuttut kisimik tunillatsinneq ajortut.

- HIV aamma annertuumik tunillaassuukkaluarpat inuiaqatigiinnut tamanna akisoorujussuussaaq, Sofie Jessen oqarpoq.

TV-kkut aallakaatitassiani quliusuni inuit arlallit atoqatigiinneq pillugu oqaloqatigineqarput.

Nûno Isbosethsenip pulaartunilu siniffimmi oqaloqatigiinnerat takuneqarsinnaajumaarput.

TV-kkut aallakaatitassiat siulliat KNR TV-kkut ippassaq aallakaatinneqartoq qulequtaqarpoq "HIV AIDS-ilu".

Aallakaatitassiaq "Atoqatigiinneq kisermaallu" sapaatiuppat decemberip ulluisa arfernganni takutinneqassaaq.

TV-kkut takutitassiat saniatigut radiukkut aallakaatitassiaq tallimat aallakaatitassiarineqarput.