Atoqatigiinneq oqallisigineqarneruli
Inuusuttuaqqat 15-it 19-nillu akornanni ukiullit akornanni kinguaassiutitigut nappaatit atugaaqaat. Oqallittartoqatigiit nunanit tamalaaneersut siunnersuusiorput kinguaassiutitigut nappaatit nunatsinni qanoq akiorniarneqarsinnaasut.
Ingerlaqqiffiusinnaasutut tikkuarneqarpoq atoqatigiinneq pillugu angajoqqaat inuusuttuaqqallu akornanni ammanerusumik oqaloqatigiittarnissaat. Ilisimatusartut nunatsinniit, Danmarkimiit, Sverige-miit, USA-miit kiisalu Canada-miit taama inassuteqarput.
Tamanna ilinniartitsisut, politikerit ilisimatusartullu oqallisigisussanngorpaat. Taakku nalilersuiffigissavaat suliniut Inuulluataaneq, tassanilu kinguaassiutitigut nappaatit akiorniarneqarput.
Suliniut taanna ukiuni marlunni ingerlareerpoq tassanilu inuusuttut angajoqqaavisalu immersugassat atorlugit atoqatigiinnermut tamatumalu oqaluuserinissaanut piginnaasatik oqaluttuarisimavaat.
Tamatuma oqallisigineqarnissaa pisussanngorpoq Ilisimatusarfimmi marsip qulingiluaanni.