Atoqatigiinneq isumannaatsoq misissuinermi sammineqassaaq

Inuusuttut akornanni atoqatigiinneq isumannaatsoq pillugu ilisimatusaatigalugu misissuineq Uummannami Paamiunilu aallartisarneqarpoq.
maajip 03-at 2011 13:56

Inuusuttut 15-it 19-illu akornanni ukiullit taakkulu angajoqqaavi misissuinermi sammineqarput.

- Atoqatigiinneq peqqissoq pillugu inuusuttut akornanni misissuineq aallartilersoq iluarinarpoq, pissutigalugu inuusuttuaqqat akornanni nappaatipalaartarneq annikilliartornarni annertusiartormat, Uummannami misissuinermik suliaqartoq Regine Fleischer oqarpoq.

Ilisimatuussutsikkut suliami inuusuttut taakkualu angajoqqaavi immersugassamik apeqqutinik imalimmik immersuissapput immikkullu oqaloqatigiisinneqassallutik. Aamma inuusuttut quui misissoqassapput misissuinerlu isumasioqatigiinnermik naggaserneqassalluni. Illoqqortoormiuni inuusuttut aamma misissuinermi peqataanissaat pilersaarutaavoq.

- Inuusuttut akornanni isumannaannerusumik atoqatigiittarnissaq misissuinermut siunertaavoq. Inuusuttut illersuutinik, soorlu usuup puuinik atuisartut taavalu atoqatigiittarneq pillugu angajoqqaaminnik oqaloqateqartartut tassaasarput isumannaatsumik atoqateqartartut. Tamannalu misissuinermi uani anguniarneqarpoq, suliniummi aqutsisoq Ruth Montgomery Andersen oqarpoq.

Suliniut "Inuulluataarneq" 2010-mi aallartittoq sumiiffiit ataasiakkaat qanimut suleqatigalugit piviusunngortinneqarpoq.

Ilisimatusaatigalugu suliami Montana State University aamma  University of Toronto suleqatigineqarput, taavalu National Science Foundation USA-miittoq suliniummut aningaasaliisuulluni.