Inuusuttuaqqanut isiginaartitsissusiaq Atoqateqaqqaarniunneq peqqinnanngilaq
Isiginnaagassiami Nalunngilarami ilitsersuisup Vivi Sørensenip nammineq inuusuttuaraalluni aqqusaarsimasani isumassarsiffigivai.
- Uanga inuusuttuaraagallarama allaannginnami atuaqatitsinni atoqateqaqqaarniunneq pisoq. Soorlu unagooq unagooq atoqateqarsimanngilaq suli, soorlu taamatut. Taava uanga taanna eqqarsartariaaseq nammineq uanga perorninni uggorisarakku, ilitsersuisoq Vivi Sørensen taama oqarpoq.
Peqqinnarnerusumik atoqateqarneq
Tamanna allaanerusumik iliuuseqarfiginiarlugu isiginnaagassiaq pilersippaa:
- Inuup nammineq aalajangissavaa qaqugu atoqateqarusunnerluni qaqugu atoqateqaqqaarusunnerluni, taava taanna unammineq arlaatigut apeqquserusullugu taavalu immaqa allaanerusumik siunnersuuteqarusullunga soorlu peqqinnarnerusumik atoqateqarnermut isiginnittariaaseq alla; imminut paarineruneq, killiliisinnaaneq taavalu imminut tatigineruneq taanna angorusullugu isiginnaagassiorusuummerpunga, Vivi Sørensen oqarpoq.
Atuartut 8.-9 klassit atuartitsiviini takutinneqartassaaq
Isiginnaagassiaq atuartunut annernut, 8-9.klassinut saaffiginnittuuvoq, atuartitsiviusartuni takutinneqartassaaq . Inuusuttuaqqat atoqatigiinnermut peqqinnartumik isiginnittariaaseqarnissaat anguniarneqarpoq, kinguaassiutitigut nappaatit kisiisa eqqartornagit.
Isiginnaagassiami Nalunngilarami isiginnaartitsisartoq Najattaajaraq Joelsen kisimiilluni isiginnaartitsivoq
- Inuusuttuaraanerup nalaani periarfissat allat aamma takutikkusunnarput soorlu suna tamarmi ilaqaqqaaniunnermut tunnganngilaq, suna tamarmi kikkummita kammalaateqarneruppat, kinamita ilaqaqqaareerpa. Tamakkununngaannaq tunngannginnami, Najattaajaraq Joelsen taama oqarpoq.
Imminut paarinerunissaq
Inuusuttuaqqat imminut paarinerunissaat isiginnaagassiami ilitsersuisup Vivi Sørensenip neriuutigaa:
- Neriuppunga eqqarsalersissinnaallugit ima: Atoqateqartariaqanngilanga ingerlaannaq. Nammineq uanga timiga akisussaaffigivara nammineq uanga aalajangissavara qaqugu atoqateqarusunnerlunga, Vivi Sørensen taama oqarpoq.
Isiginnaagassiaq "Nalunngilara" Nunatta Isiginnaartitsisarfiani sisamanngorpat takuteqqaarneqassaaq. Avannaanilu ukiup naannginnerani aamma takutinneqassalluni. Nuna tamakkerlugu takutinneqarnissaa pilersaarutaasoq, Nunatta Isiginnaartitsisarfiata ilisimatitsissutigaa.