Atomip nukinganik nukissiuutiliorsinnaanngorpoq
Taamaalilluni Naalagaaffiit Peqatigiit nunap taassuma atomip nukinganik sakkussiorsinnaanissaanut akornusersuinertik ukiuni 19-ini attuuttoq taamaatissavaat.
Tamatumunnga peqatigitillugu Naalagaaffiit Peqatigiit isumannaallisaaniaqatigiivisa, aalajangersakkat marluk Irakimut tunngasut akuersissutigaat.
Aalajangiunneqartumi siullermi isumaqatigiinngissutaaqisoq uuliamik akiliilluni nerisassarsisarneq unitsinneqassaaq. Aappaatullu politikerit kisermaassilluni naalakkersuisuusimasup Saddam Husseinip nalaani ajortuliorsimasut unnerluutigineqarsinnaannginnerat, aappaagu juulip aallaqqaataanniit atuukkunnaassaaq.
Uuliamik akiliilluni nerisassarsisarneq Naalagaaffiit Peqatigiit 1996-imi atuutilersippaat. Taanna najoqqutaralugu Irak isumaqatigiissuteqareernermigut uuliamik aalajangersimasumik annertussusilimmik nunanut allanut tunisaqarnermigut nerisassanik, nakorsaatinik inuunermilu pinngitsoorneqarsinnaanngitsunik pisinnaavoq.
Taamatut iliuuseqarnikkut, Irakimiut inuuniarnikkut ikiorserneqarnissaat siunertarineqarpoq, naak nuna 1991-imi Persiap Kangerliumanersuani sorsuuttoqarnerata kingornagut aningaasarsiornikkut pillaatitut killilersugaagaluartoq.
