Atomip nukinganik nukissiorfiliaq puttasoq Ruslandimi atulerpaat
Ruslandimi illoqarfiup Sankt Petersborgip avataani immamut inissinneqarpoq, atomip nukinga atorlugu nukissiorfissuaq, taannalu nunarsuatsinni siullersaavoq, taama nalunaaruteqarput russit atomimik tuniniaavissuat, Rosatom.
Atomip nukinga atorlugu nukissiorfissuaq atserneqarsimasoq Akademik Lomonosov, suliaralugu naammassineqariaruni misilerarlugu aallartinneqassaaq.
Piareerpat Sankt Petersborgimiit danskit imartaat aqqutigalugu Ruslandip avannaanut issittumut ingerlanneqassaaq.
Nukissiorfik Ruslandip avannaani innuttaasorpassuarnut innaallagissamik pilersuissaaq. Nukissiorfiillu sinneri amma naammasseriarpata ilaatigut naturgassimik pilersuinissamut atasumik nukissiornermik pilersuinermut atorneqassapput.
Ruslandimi oqartussat naatsorsuutigaat nukissiorfissuaq 2012-mi atulerumaartoq. Naatsorsuutigineqarportaaq nukissiorfissuaq ukiuni sisamani tallimaniluunniit immami puttasinnaassasoq, tamatumalu kingorna nunap qaavanut ilineqassasoq oqaatigineqarluni.
Imaani puttasinnaasunik nukissiorfiliorneq 2007-mi aallartinneqarpoq, siunertaavormi atomip nukinga atorlugu nukissiorfissuit sisamat Sibiriap avannaani immami tissukartinneqassasut.
