Atomip nukinganik innaallagissiorfiliorniat akerlerineqarput

Alaska-mi illoqarfeeqqat ilaanni Galena-mi atomip nukinga atorlugu innaallagissiorfittaarnissaq pilersaarutigineqarpoq.

Galena-mi innuttaasut Amerikap sinneranut naleqqiullutik pingasoriaammik akisunerusumik innaallagissamut akiliisarnertik naammaginngilaat.

Atomip nukinganik innaallagissiorfiliotartoq Japanimiunit pigineqartoq, Toshiba, illoqarfeerannguamut Galena-mut neqeroorsimavoq, Atom-isortumik nukissiorfeeqqamik misiligutaasussamik akeqanngitsumik sanaartuusserusullutik.

Atomip nukinganik ingerlasumik innaallagissiorfiliortoqarpat illoqarfeerannguup Galena-p taamaallaat isumagissavaa atom-mik nukissiorfeeqqap ingerlanneqarneranut aningaasartuutissat.

Atom-isortumik innaallagissiorfimmik pilersitsoqarpat innaallagissamut akiliutigineqartartoq pingasoriaammik appassasoq Galeenami borgmesteri-mit oqaatigineqarpoq.

Atom-i atorlugu innaallagissiorfiliortoqarnissaa pillugu isumaliulerneq illoqarfinnit saniliusunit akerliuffigineqarpoq, taamatuttaarlu Alaska-mi naggueqatigiit atomi atorlugu innaallagissiorfiliornissamut akerliunertik nalunaarutigisimavaat.