Atomip nukinganik ilisimasalik toqutaavoq
Danmarkip Radioata tusagassiissartua Steen Nørskov naapertorlugu atomip nukinganik immikkut ilisimasallit amerlasuut periarfeerunneqarsimanngikkunik eqqumiiginarsimannaasumik kingullertigut ajunaarsimapput:
Professor Ali Mohammadi, Teheranip avannarpasinnerusortaani angerlarsimaffimmi silataani toqutaasoq, Iranimi oqartussat oqaatigaat, qaartartoq motorcykelinut inissinneqarsimasoq ungasianiit qaartinneqarneratigut toqutaavoq.
Mumisitsinermut akerliusut qaartartumeerisuunerarneqarput, soorlu aamma USA Israelilu pisuutinneqartut. Iranimi præsidentimut siorna juunimi qinersisoqarmalli Iranimi eqqissiviilliornerit 1979-imili mumisitsisoqarmalli aatsaat taama ingasatsigipput.
Professorip Ali Mohammadip toqutaaneratigut professorit katillugit arfinillit siorna maajimili toqutaareerput. Atom-fysikeri alla taamanikkut maajimi Saudi-Arabiami Mekkamut ilerfiartilluni periarfeerunneqarpoq, atomillu nukinga atorlugu nukissiorfik Iranimiunit isertuunneqartoq nutaaq USA-mit qaammatit sisamat qaangiummata paasineqarluni.
Ilisimatuup killisiorneqarneratigut nukissiorfiup nutaap taassuma piunera paasineqarsimanersoq ilisimaneqanngilaq, Iranimiulli oqartussaasuisa qaammat ataaseq qaangiummat oqaatigaat USA aamma Saudi-Arabia angutip periarfeerunneqarneranut akisussaasuusut.
Iranimiut atomip nukinganik atuinnginnissaat anguniarlugu nunat assigiinngitsut isertortumik akersuunnerannik tamanna takussutissaanersoq, Iranimi nunanilu allani alaatsinaattut eqqoriarpaat, akissulli ilisimaneqanngilaq, Mohammadimillu toqutsisut kikkuusimanissaat paasineqarnaviarunanngilaq.
