Atomip amiakkui Atlantikumut anngupput
Qinngornerit radioaktiviusunik akullit, maanna Islandimut tussimasut uppernarsineqarpoq, Rekyavikimilu uuttuinermit takuneqarsinnaavoq tamakku kangimut Europap tungaanut ingerlaartut.
Danmarkimi sillimaniarnermut aqutsisoqarfik qinngornerit radioaktiviusut nunatsinnut tussinnaanerannik nakkutilliisoq ilisimatitsivoq, suli maanna takuneqarsinnaanngikkallartoq qinngornerit radioaktiviusut Nunatsinnut tussimanersut.
Nutaarsiassaqartitsivit Reuter nalunaarpoq qinngornerit radioaktiviusut Europamut aqagu anngukkumaartut.
FNip uuttuisarfia Islandimiittoq suliniaqatigiiffiup CTBTOp pigisaa uuttuisuuvoq. Taakku nakkutigisarpaat atomitalinnik misiliutinik qaartoqartillugu qinngornerit radioaktiviusut. Erseqqissaatigaat qinngornerit radioaktiviusut annikitsuararsuit taamaallaat Japanimiit Europamut ingerlaartut. Aamma erseqqissaatigaat uippallernissamut maanna pissutissaqanngitsoq.
Frankrigimi atomip qinngornerinik nakkutilliisut ilimagaat silaannaap ilai annikitsuinnarmik ulorianartumik akullit pingasunngornermi Frankrigimut anngukkumaartut.
- Silaannaq tamanna mingutsinneqarsimasoq inuit peqqissusaannut sunniuteqarnavianngilaq, taama franskit atominik nakkutilliisoqarfiat tusagassiorfinnut nalunaarpoq.