Atomimik qaartitsiniarneq Kinap soqutigeqqunngilaa

Kina-p nunarsuarmiut kajumissaarpai Korea Avannarlermiut misileraallutik atomimik qaartitsiniarnerat annerusumik iliuuseqarfigeqqunagu.

Ilumut misileraalluni qaartitsisoqassanersoq ilisimaneqanngilaq, Kinamiut oqarput. Maanna siullerpaatillugu Korea Avannarlermiut isumaqatiginiarneqarnissaat aallartinneqartariaqarpoq:

Korea Avannarlermiut misileraallutik atomimik qaartitsiniarnerannut unitsitsisinnaasut tassaapput Kinamiut.

Korea Avannarleq aamma Kina naalakkersuinikkut aningaasarsiornikkullu qanittumik suleqatigiittuupput. Matumani Kina sunniuteqarsinnaanersoq apeqqutaanngilaq, apeqqutaaginnarporli Kina-p sunniuteqarsinnaanini qanoq atsigisumik atorniarneraa.

Kinamiut Koreamut Avannarlermut ikummatissanik aamma nerisassanik pilersuineq ullormiit ullormut unitsissinnaavaat. Kinamiut taamatut iliuuseqarsinnaanertik maannamut suli atorsimanngilaat. Taamaallaat ukiut pingasut matuma siornatigut Korea Avannarlermiut isumaqatigiinniarnermik ingerlatsiumanngimmata Kinamiut Koreamut Avannarlermut uuliamik pilersuinertik unitsikkaluarpaat.

Taamaattorli Kinamiut mianersorput. Tassami nalunngilaat Taiwan aamma Japan isumannaatsuunissamut aarlerinartorsiortitsisinnaanerusut.

Amerikamiut piumasaqarnerat naapertorlugu Koreamut Avannarlermut aningaasarsiornikkut killilersuiniarnerit

iluaqutaanngitsut Kinamiut oqaatigaat. Killilersuinerit Korea Avannarlermiunut puffassaataaginnarput atomillu nukingamik sakkussiornissaannut kaammattuutaaginnarlutik.

Taamaattumik Kinamiut isumaqarput isumaqatigiinniarnerit ingerlanneqartariaqartut, tassami Korea Avannarlermiut misileraallutik atomimik qaartitsiniarnerat nunarsuarmiunit eqqisseqatigiinnermut akornutaasutut isigineqarmata.

Taamaattumik Kinamiut isumaqarput Korea Avannarlermiut nunallu eqqaaniittut USA peqatigalugu isumaqatigiinniartariaqartut.

Tamatumunnga alloriarneq siulleq pissaaq sapaatip akunnerani tullermi Kina Japan Korealu Kujalleq pisortatigoortumik ataatsimeeqatigiilerpata.