Atomimik qaartartorsuup Hiroshimami nakkartinneqarneranit ukiut 73-inngortut
Atomimik qaartartorsuup Japanimi Hiroshimami nakkartinneqarneranit ullumi ukiut 73-inngorpaat, qaartartorsuarmi Hiroshimami aggustip ulluisa arfernanni 1945-mi nakkartinneqarpoq.
Allattoq Anton Gundersen Lihn
aggustip 07-at 2018 07:14
Nutserisoq Mads Lynge
Japanimi tamanna malunnartinniarneqarpoq, atomip nukinganit pisumik sakkussiarsualiortoqarunnaarnissaa ilaatigut oqaatigineqarluni.
Nutaarsiassaqartitsivik AFP taama allaaserisaqarpoq.
Oqaluttuarisaanerup ilikkarfiunissaa pingaaruteqartoq, oqalugiartut ilaata, Hiroshimap borgmesteriata Kazumi Matsuip eqqaasitsissutigaa:
- Inuit oqaluttuarisaanertik puigorunikku, oqaluttuarisaanermiluunniit pisimasut aallaavigalugit iliuuseqanngikkunik kukkuluttortoqaqqiinnassaaq. Hiroshima taamaammat eqqaajuaannassavarput. Atomimik qaartartorsuit atorunnaarsinneqarnissaannut sukataaruteqartuaannartariaqarpugut, Kazumi Matsui oqarpoq.
