Atomimik nukissiuuteqarneq pillugu ataatsimiinnissaq kinguartinneqarpoq

EU pitsaanerusumik siunnersuuteqarniassammat naalagaaffiit assigiinngitsut Iranip atomimik nukissiuuteqarnera pillugu ataatsimiinnissaraluat kinguartinneqarpoq.

- EU-p neqeroorutigisimasaanik atuiniarani Irani nalunaaruteqarsimammat taama kinguartitsisoqarpoq, præsident Mahmoud Ahmadijenad oqarpoq.

Atomip nukinga atorlugu Iranimi nukissiuutit imermik iluaqusersukkat, Ruslandimit nakkutigineqartut, EU-mit neqeroorutigineqarsimapput.

Iranip nammineq nakkutiginninnini, neqerooruteqarnerup kingunerisaanik unitsittussaanngussammagu, neqeroorut Iranimi præsidentip atorusussimanngilaa.

- Iluaqutissatsinnik tuniniarluta oqaluttarput. Kuultiutigut tigoriarlugit qaqqortarissanik sukkulaatinillu taarserniarsarissanngilaat - sianiitsuunngilagut, Iranimiut præsidentiat Arakimi ataatsimeersuarnermi peqataalluni ilaatigut oqarpoq.

Tuluit Nunaanni, Tysklandimi, Frankrigimi, USA-mi Ruslandimi Kinamilu atorfilittat tallimanngorpat ataatsimiinnissaraluat kinguartinneqartoq, tuluit naalakkersuisui ullumi nalunaarput.

Iran USA-mit EU-millu atomimik qaartartuliorsorineqarpoq. Tamannali Iranimit ilumuunnginnerarneqartarpoq.