Atomimik atortussiat peqqarniisaarnianit tiguneqanngisaannassapput
Obamap pisortanut nunanit 47-neersunut erseqqissarpaa, pisortani qullersat ulluni marlunni ataatsimiinnerat - qaaqqusisuuffigisani - tassaasoq "oqaluinnarani, kisiannili iliuuseqarfiussasoq".
Peqqarniisaarniat atomimik sakkussianik pigisaqalernissaannut ulorianartorsiorneq Amerikami immikkut ilisimasalinnit annertusiartortutut nalilerneqarpoq. Peqqarniisaarniani al-Qaedakkunni pisortat arlaleriarlutik atomimit sakkussianik pissarsiniartarsimapput. Nunalli allat qularnerupput isumaqaratillu ulorianartorsiorneq sukkulluunniit piumaartoq.
USA-p pisortani qullersat ataatsimiinnissaanni atomimik atortussiat isumannaatsuunissaasa annikitsumik sammineqarnissaat aalajangiunniarsimagaluarpaa, avataatigulli Obamap Iranimut pillaatitut iliuuseqarnissami nunat tamalaat tapersersuinissaat ilungersuutigalugu.
Det Hvide Husimit nalunaarutigineqartoq naapertorlugu Kinap præsidentiata Hu Jintao-ip Obama neriorsorsimavaa Kina Naalagaaffiit Peqatigiit nutaamik isumaqatigiissusiornissaanut peqataajumasoq, tamatumani Iranip oqallisaaqisumik atomimik sakkussianut pilersaarutaa akerlilerniarlugu pillaatitut iliuuseqarnissat nutaat periarfissinneqassammata.
Iranip, Washingtonimi pisortani qullersat ataatsimiinneranni aggersarneqanngitsup, nalunaarutigaa, Iran atomi pillugu ataatsimiinnissamut, Teheranimi sapaatip akunnerata naanerani pisussamut, nunanilu 15-ini nunanut allanut ministerinit peqataaffigineqartussamut, nammineq qaaqqusisuussasoq.
