Atomi atorlugu nukissiuutinik sanaartortitsiniarput
Atomi atorlugu nukissiuutit imaani angallanneqarsinnaasut, atorfissaqartinneqarfiinut nuunneqarsinnaassapput, taakku najugaqarfinnut 45,000-inik inoqartunut pilersuisinnaassapput, taassuma saniatigut immap tarajua imerneqarsinnaasunngorlugu saliissutinik atortorissaaruteqassapput.
Atomi atorlugu nukissiuuteqarfiit imaani innaallagissamik pilersuisinnaasut umisuarnut aamma uuliasiorfinnut assingusuupput. Atomi atorlugu nukissiorfinnik imaani atorneqarsinnaasunik arfineq-pingasunik Rusland sanatitsiniarluni pilersaaruteqarpoq.
Nukissiorfik siulleq umiarsualiorfimmi Sankt Petersborgimi sananeqaleruttorpoq. Atomi atorlugu nukissiorfiup imaani innaallagissamik pilersuisinnaasup sananeqarnera ataaseq koruunip milliardip aappaata affaa sinnerlugu akeqarpoq.
Kina, Indonisia aamma Algeria pisinissamut soqutiginnillutik nalunaarsimasut arabiamiut TV-eqarfianni Al Jazeerami oqaatigineqarpoq.
- Rusland ukiut 50-it sinnerlugit umiarsuarnik atomimik iluaquteqartunik atuinermut misilittagaqarpoq, aamma ajutoornernik kinguneqartoqarsimanngilaq, taamaattumik sanaartortitisinissaq ernumanartoqanngilaq, atomi atorlugu nukissiuutinik imaani innaallagissamik pilersuisinnaasunik sanaartortitsivimmi pisortaq Sergey Zavyyalov, TV-qarfimmi Al Jazeerami apersorneqarluni oqarpoq.
Nukissiuutinik imaani atorneqarsinnaasunik sannaartortitsiniarnermik isornartorsiusut isumaqarput, pinerliiniat piiaasulluunniit Somaliap avataaniittut, atomi atorlugu imaani nukissiorfik saassukkaluarpassuk ajortorujussuarmik kinguneqarsinnaasoq, imaluunnit nukissiorfik imaani ajutooraaluarpat ajortumik kinguneqarsinnaammat.
Nukissiuutinik pilersuisut tamakkua allamut nuunneqarsinnaasut, issittumi uuliamik gasimillu ujaasinermi piianermilu Ruslandimut iluaqutaassasut Rusland isumaqarpoq, piiaanerit ujaasinerillu ukiup qanoq ilinera apeqqutaatinnagu aallartinneqarsinnaammata.