Atlantikup saarullia nungutaariaannaavoq
Saarullik uumasunut nungutaaqqajaasunut ilannguteqqajaavoq. Canadami naalakkersuisut uumasunik nungutaaqqajaasunik nalunaarusiaat nutaaq saqqummiunneqaqqammersoq upperissagaanni taamaappoq.
Allattoq Elisa Isaksen
maajip 05-at 2010 11:56
Atlantikup saarullia, Akilinermi Qeqertaaluup kujataaniit Paggivittamut Nova Scotiallu tungaanut isorartussusilimmi nungutaariaannaasoq, Nalunaarusiami oqaatigineqarpoq.
Nungutaanissamut ima navianartorsiortiginerarneqarpoq, allaat ukiut 40-t qaangiutsinnagit saarullik nungutaareersimassasoq oqaatigineqarluni.
Nalunaarusiami oqaatigineqarpoq, tamatumunnga pissutaasoq aalisapilunneqarnerujussua immamilu allanngoriartornerit.
Canadami aalisarnermut ministeri Gail Shea, CBC radiumut oqarpoq, saarulliup nungutaaqqajaaneranut oqaaseqartinnani, nalunaarusiaq sukumiisumik misissoqqaarniarlugu.
