Atlantikup kujasinnerusortaani uuliakoornerujussuaq

Maltamiut nioqqutissanik assartuussuat Nightingale Islandimi Atlantikup Kujasinnerusuaniittumi ikkarleqqavoq uuliakuulersimallunilu, imarsiornermut tunngasunik nutaarsiassaqarfik maritimedanmark.dk allaaserinnippoq.

Assartuussuaq qeqertat tikinneqajuitsut qaarsooqisut akornanni qanoq ililluni ikkarlissimanersoq suli ilisimaneqanngilaq.

Ikkarleqqaarmat tankini ballasteqarfinni marlunni putusoqarpoq, malissuilli kingorna umiarsuaq sakkortuumik orfaatilermassuk orsussaqarfia putuvoq, maannalu uuliakuulerluni.

Nightingale Islandip sineriaata ilarujussua uuliaannarsuusoq, tristantimes.com allaaserinnippoq.

Qeqertat taakku Unescomit - Nunarsuarmi kinguaariit kingornutassaattut eriagisatut - naliligaanikuuvoq. Qeqertat taakku qeqertaqatigiinnut Tristan da Cunhamut katillugit 275-iinnarnik inoqartunut ilaapput.

Qeqertat Atlantikup Kujasinnerusuani Afrikap aamma Amerika Kujalliup akornanni inissisimapput, nunarsuarmi inoqarfiit avinngarusimanerpaat ilagalugit.

Nunavik qaninnerpaaq Sydafrika sømiilinik 1.000-t sinneqartunik ungasinnerusumiippoq, tassanngaanniillu kalittaat annaassiniartartunik issimasulik uuliamillu mingutsitsinermik saliisinnaasoq aallartinneqaqqammerpoq.

Assartuussuaq eertaasanik sojabønnenik 65.266 tonsinik usisoq Brasiliamiit Singaporeliartilluni ikkarlippoq.