Atlantikup avannaata kangiani avaleraasartoortassat pillugit isumaqatigiissuteqartut

Aammattaaq sillimmatitut 164.000 tonsit immikkoortinneqarput, taakkulu nunanut isumaqatigiissummut ilannguttunut tunniunneqassapput - tassalu Islandimut, siornatigut namminersuutigalugu Savalimmiut peqatigalugit avaleraasartoortassaminik qaffaasimasumut.
 
Pisassiissutinik agguaassineq 2014-18-imut isumaqatigiissummut Londonimi marsip aqqaneq aappaanni isumaqatigiissutigineqartumut, EU-p Savalimmiut Norgellu akornanni avaleraasartoortassat pillugit saqitsaattoqarneranik aaqqiissuteqarfiusumut malitseqartitsineruvoq.

AAMMA ATUARUK Avaleraasartoortassat isumaqatigiissutigineqartut

Pisassiissutinik taama agguaassisoqarneratigut aappaagu avaleraasartoorniarnissaq piujuaannartitsinissamik tunngaveqarluni ingerlanneqassasoq, Imaani ilisimatusarnikkut siunnersuisoqatigiinnit, Ices-imit oqaatigineqartoq, EU-Kommissioni ilisimatitsivoq.
 
Aalisarnermut Naalakkersuisoqarfimmi pisortap Jørgen Isak Olsenip oqaatigaa, qinersinissaq Naalakkersuisunillu nutaanik pilersitsinissaq utaqqimaaritik, aatsaallu tamatuma kingorna avaleraasartoortassat pillugit EU-mi nutaamik isumaqatigiissutigineqartoq isummerfigisinnaassagitsik.
 
- Taamaattorli ukiormanna pisassiissutit 100.000 tonsiusut pallillugit amerlassuseqartunik aappaagu namminerisatsinnik avaleraasartoortassinneqarnissarput naatsorsuutigaarput, Naalakkersuisoqarfimmi pisortaq Jørgen Isak Olsen Radioaviisimut oqarpoq.