Atlantikup Avannaani Suleqatigiit soqutiginninneq annerusoq pilersippaat
Folketingimi Atlantikup Avannaani Suleqatigiit nunatsinnut annerusumik soqutiginninneq pilersissimavaat. Taama isumaqarpoq Danmarkip Radiuani naalakkersuinikkut naliliisartoq, aaqqissuisoq Henning Olsson.
- Naliliinera naapertorlugu isumaqarpunga sunniuteqarluarsimasut, ima paasillugu Atlantikup Avannaani pissutsit, arlalinnut tunngassuteqartut, ingammik Kalaallit Nunaanni pissutsit oqallisigineqarnerat angusinnaasarsimavaat. Soorlu kingullermik aasaq sioqqutitsiarlugu silap pissusaa pillugu ornigarneqarluartumik ataatsimeersuartitsipput. Tassa taamaalillutik oqallinnermik pilersitsisinnaasarput.
Apeqqutigineqarmat taamaalillutik Nunarput sunniuteqarnerulersissimaneraat, Henning Olsson akivoq sunniuteqarneq tassuunakkut uuttoruminaatsoq. Tassami Folketingimi sunniuteqarsinnaanerat killeqareerpoq, kisianni Kalaallit Nunaat pillugu oqallitsitsisarnermikkut, assersuutigalugu Namminersorneq pillugu Isumalioqatigiissitami sulineq sunniuteqarfigisarpaat.
Apeqqutigineqarmat kalaallit Folketingimi ilaasortaatitaat saamerliunianut talerperliunianullu avinneqassagaluarpata, Atlantikup Avannaani Suleqatigiit ingerlaannarsinnaanerat ilimagineraa, Henning Olsson akivoq, tamanna nalileruminaatsillugu. Tassami ullumikkut maluginiarsimavaa, Suleqatigiinni ilaasortaasut tassaammata kalaallit ilaasortaatitaat marluk kiisalu Høgni Hoydal Republikaneriusoq Savalimmiuneersoq aamma Savalimmiormiut ilaasortaatitaasa aappaat Anfinn Kallsberg ilaasortaanngitsoq, Konservativinillu suleqateqarusunnerusoq.
- Qangaaniilli ileqquuvoq Atlantikup Avannaamiui Folketingimi partiinut pioreersunut ilannguttarnerat. Kalaallillu Folketingimut ilaasortaatitaat talerperliunianut saamerliunianullu avinneqassagaluarpata partiinut pioreersunut ilaalernissaat ilimanarneruvoq, taamaattorli oqallittarfimmik pilersitsinissaat ilimagineqarsinnaalluni, Henning Olsson naggasiivoq.
Atlantikup Avannaani Suleqatigiit 2001-imi Folketingimut qinersinerup kingorna pilersinneqarput, tassani suleqatigiillutik Nunatta ilaasortaatitai marluk aamma Savalimmiormiut ilaasortaatitaasa aappaat, taakkua ilaatigut Nunatta Savalimmiullu nammineernerulernissaat anguniagaraat.
Siumup aamma Inuit Ataqatigiit Atlantikup Avannaani Suleqatigiit ingerlaannarnissaat qineqqusaarutigaat. IA-p qinigassanngortitaasa ilaata Sofie Rossenip suleqatigiit ingerlaqqinngippata Nunatsinnut ajunaarutaassasoq oqaatigaa.
Kisianni sapaatip akunnerani kingullermi fjernsynikkut Itisiliinermi Atassut aamma Demokraatit oqaatigaat qinigaatitaqaraluarunik Atlantikup Avannaani Suleqatigiinnut ilanngunniaratik. Taarsiullugu Danmarkimi partiit Venstret aamma Konservativit suleqatigerusunneruaat.
