Atlantikup avannaani silaannakkut angallanneq pillugu ataatsimeersualersut

Folketingimut ilaasortaq partiimit Tjóðveldimeersoq, Magni Arge, taama isumaqarpoq.

Danmarkip Europallu qulaatigut silaannakkut angallannermut malitarisassiuussisussamik periusissiornissaq danskit naalakkersuisuisa sulissutigileruttorpaat.  

Silaannakkulli angalannermut suliassaqarfik danskit suli akissussaaffigaat, Magni Argelu naapertorlugu Nunarput Savalimmiullu Danmarkimi sumiiffinnut avinngarusimasunut assingusumik pineqakkajuttarput. Tassalu Københavnip Timmisartoqarfissua SAS-ilu sammineqarnerpaasarlutik.

Silaannakkulli angallanneq Atlantikup avannaamiunut Danmarkimut naleqqiullugu pingaaruteqarneruvoq. Taamaammat danskit naalakkersuisuisa Folketingillu Europami silaannakkut angallannermi pissutsit isiginiarpallaarnagit Naalagaaffeqatigiinni pissutsit isiginiarnerusariaqarpaat, Magni Arge taama isumaqarpoq.

Tamannalu tunngavigalugu Christiansborgimi ullumi ataatsimeersuartitsinissamut qaaqqussivoq, tassanilu ilaatigut danskit assartuussinermut ministeriat Ole Birk Olesen (LA), aamma Atlantic Airwaysimeersut Air Greenlandimeersullu peqataassapput.