Atlantikup avannaani nunat suleqatigiit EU ikiortiseraat
Europami nunat suleqatigiit sikuiuitsoq avannarleq soqutiginerulertariaqarpaat. Taama isumaqatigiipput Nunat Atlantikup avannaaniittut suleqatigiiffiat ukiumoortumik Nuummi ataatsimeeqatigeeqqammersoq. EU-mi paasissutissiisarfimmik pilersitsisoqassaaq, sikuiuitsumi avannarlermi paasisanik ajornartorsiutaasunillu katersuiffiusussamik siammarteriviusussamillu. Peqataanik EU kaammattorneqarpoq sikuiuitsumut avannarlermut paasissassarsiortussanik pilersitseqqullugu.
Siunnersuisoqatigiit siulittaasortaavata Karl V. Matthiassonip nunat avannarliit tamaasa kaammattorpai Atlantikup avannaani sillimaniarneq siuarsaqqullugu. Atlantikup avannaani annaassiniarnermi sungiusarnerusalernissaq, ajunaarnersuaqarsinnaaneranullu sillimmartaaqatigiinnissaq nunat avannarliit naalakkersuisuisa peqatigiillutik aqqutissiuuttariaqaraat Matthiassonip aamma kaammattuutigaa.
