Atlantikup avannaani inuussutissarsiornikkut periarfissat pillugit ataatsimeersuartoqalersoq

Nunat Avannarliit Siunnersuisoqatigiivisa Issittoq pillugu Folketingimi suleqatigiissitaat Folketingip Kalaallit Nunaannut tunngasunut ataatsimiititaliaa, Savalimmiunut tunngasunut ataatsimiititaliaa aamma Inuussutissarsiorneq pillugu ataatsimiititaliaa peqatigalugit Atlantikup avannaani inuussutissarsiornikkut periarfissat nutaat pillugit ataasinngorpat apriilip 20-ani ulloq naallugu ataatsimeersuartitsilerpoq.
Assi © : Simon Uldum
apriilip 16-at 2015 07:47
Nutserisoq Simon Uldum -

Inuussutissarsiutit pillugit ataatsimeersuartitsinermi Europamit Kangianillu Issittoq aqqutigalugu umiarsuarmik assartuinikkut inuussutissarsiutitigut periarfissat kiisalu Kalaallit Nunaanni Savalimmiunilu takornariartitsilluni inuussutissarsiuteqarnermik ineriartortitsinissamut periarfissat sammineqassapput, tamanna Folketingimi suleqatigiissitap tusagassiorfinnut nalunaarutaani atuarneqarsinnaavoq.

Politikerit inuussutissarsiutinillu ingerlatallit Danmarkimeersut, Nunatsinneersut Savalimmiuneersullu Issittumi silap pissusiata allanngoriartorneratigut Issittup aningaasarsiorfiginissaanut nunanit tamalaanit soqutigineqaleraluttuinnarneranik malitseqartut ataatsimeersuarnermi oqallisigissavaat.

 

Nunatsinnit saqqummiisussat arlaqarput

Ataatsimeersuarneq Nunat Avannarliit Siunnersuisoqatigiivisa suleqatigiissitaliaanni siulittaasumit Savalimmiuniillu Folketingimut ilaasortaasumit Sjúdur Skaalemit ammarneqassaaq, taassumalu Savalimmiut Kalaallit Nunaatalu aningaasaqarnikkut inissisimanerat nunallu atlantikup avannaamiut marluusut inuussutissarsiornikkut periarfissaasa nutaat qanoq pingaaruteqatiginerat pillugu saqqummiussissaaq.

Ataatsimeersuarnermi nunatsinnit saqqummiisussat ilagaat Visit Greenlandimi pisortaq Anders Stenbakken, Arctic Winter Games 2016-imi pisortaq Maliina Abelsen kiisalu Sulisitsisut Peqatigiiffianni pisortaq Brian Buus Pedersen, taakkulu Issittup soqutigineqarnerulerneranut atatillugu inuussutissarsiornerup takornariartitsinerullu iluani periarfissat immikkut sammissamaarpaat.